O gromo de gripe aviaria na granxa de visóns da Coruña: nin excepcional nin de moito risco

Esta semana, a Consellería do Medio Rural deu unha alerta sanitaria sobre un gromo de gripe aviaria nunha granxa de cría de visóns para a industria téxtil. A decisión que tomaron as autoridades foi matar ás 8.369 femias reprodutoras e ás 43.617 crías destetadas que tiñan no recinto. Máis de 52.000 exemplares de visón americano “sacrificados” para tratar de evitar unha expansión da cepa H5N1. Aínda que moitas informacións falan dun punto de inflexión na expansión da gripe, o decano da Facultade de Veterinaria da Universidade de Santiago de Compostela, Gonzalo Fernández, nega que sexa algo excepcional: “Non é a primeira vez que acontece. Xa houbo saltos de aves silvestres a animais domésticos. Pasa todos os anos“.

O decado de Veterinaria explica que, nesta fase de expansión, este subtipo do virus da gripe aviaria non é, aínda, perigoso: “Podería selo no caso de que se seguise expandindo e lograse unha recombinación humana. Por iso, o sacrificio que se está a levar a cabo é necesario para diseminalo”. O investigador explica que esta cepa de gripe aviaria está nunha fase “moi afastada” de ser perigosa e que, ademais, un salto entre especies deste tipo non significa, per se, un aumento do risco: “Polo de agora, aínda que salte de aves silvestres a visóns, a cepa segue a ser a mesma e, polo tanto, o risco de contaxio tamén“.

Publicidade

Como adoita acontecer coa gripe aviaria, os contaxios veñen de aves migratorias que entran en contacto con aves e outros animais domesticados: “A realidade é que é moi complicado. Para que aconteza, tería que darse unha exposición cun contacto moi directo e prolongado no tempo. Os controis que temos na Unión Europea soen frear estas expansións moi rápido e o certo é que os descontrois adoitan vir de países con menores controis veterinarios. Como pasou coa pandemia de México en 2004″, remata.