A primeira paciente en Galicia en recibir a vacina fronte á Covid-19, Nieves Cabo Vidal, usuaria da residencia Porta do Camiño de Santiago de Compostela, foi este domingo a primeira en recibir a segunda dose, ás 08,23 horas. Ademais, foi a primeira persoa en España que completou o proceso de inmunización.
Pola súa banda, a enfermeira que vacinou a Nieves nas dúas ocasións, Yolanda Moares, foi hoxe tamén a primeira sanitaria en recibir a segunda dose da vacina fronte á Covid-19 en Galicia.
Deste xeito, comezou a segunda rolda de vacinación nas residencias de maiores de Galicia. A administración da segunda dose da vacina aos usuarios e traballadores das residencias de maiores e de discapacidade coincide no tempo coa aplicación da mesma ao segundo colectivo identificado de maneira prioritaria, o dos profesionais da sanidade, tanto da hospitalaria como de atención primaria, que en Galicia empezaron a recibila o pasado mércores con previsión de chegar este luns aos 20.000 vacinados coa primeira toma.
Tras recibir a vacina, Nieves Cabo manifestou: “Como estou? Ben, ben, ben… non a sentín sequera”, manifestou esta brionesa, antes de recomendarlle a todo o mundo que non deixe de vacinarse, se ten ocasión, porque “é unha cousa marabillosa”.
