Varias empresas e institucións galegas presentaron este luns no CiMUS o proxecto Neogalfarm, unha iniciativa destinada á procura de novos medicamentos para o tratamento contra o cancro. Os esforzos centraranse no desenvolvemento de terapias dirixidas a diversas dianas terapéuticas e de tratamentos combinados.
En Neogalfarm participan as empresas AMSlab, Galchimia (gañadora dos Premios Galicia Spin-Off, que organiza GCiencia), Nanogap e Oncostellae, e varios grupos de investigación da USC, o IDIS e o centro Leitat. Ademais, a iniciativa está subvencionada pola Axencia Galega de Innovación, a través do programa Conecta Peme, confinanciado polo Feder e apoiado pola Consellería de Economía, Emprego e Industria.
No acto deste luns, presentado por Carme Pampín, CEO de Galchimia, tamén interviron Manuel Lolo, de AmSlab, Tatiana López, de Nanogap, Jacobo Cruces, de Galchimia, e Guido Kurz, de Oncostellae.
