A científica galega Marisol Soengas, unha das referencias internacionais na investigación contra o melanoma, expón que o risco deste tipo de cancro de pel está na súa gran capacidade de expansión e mutación a través das metástases. O cancro espállase a través das células tumorais circulantes (CTCs) que se trasladan a través do sangue a outras partes do corpo. E estas metástases son, realmente, a causa de moitas das mortes do cancro, alén do tumor primario.
Estas células constitúen unha das batallas que xogan na actualidade os científicos, con técnicas como a biopsia líquida, que analiza o sangue na busca de posibles sinais da metástase. E unha investigación que esta semana publica a revista Science Traslational Medicine expón unha tecnoloxía que, de desenvolverse e perfeccionarse, podería ser un arma potente contra as metástases: un equipo da universidade de Arkansas probou con éxito un láser que pode detectar as CTCs e destruílas desde o exterior.
Unha técnica fotoacústica non invasiva, que “ten o potencial de inhibir a progresión da metástase” no melanoma, segundo indica un dos autores da investigación, Vladimir Zharov. Crearon un tipo de láser, chamado Cytophone, que se emite cara a estas células, conseguindo que estas absorban moita máis enerxía en forma de calor que as células normais. Así, as CTCs acaban destruídas.
“O uso dos láser está revolucionando o diagnóstico e tratamento das doenzas. Porén, este tipo de láseres conseguiu previr o seu uso en moitas aplicacións médicas a nivel celular”, dixera Zharov en 2017 co gallo da publicación doutro artigo da mesma liña de investigación. E estes novos resultados son prometedores: “Nun paciente, conseguimos destruír o 96% das células tumorais”, declara o investigador.
Do mesmo xeito, as investigacións realizadas por Zharov e o seu equipo expoñen que a posibilidade de que o láser poida mellorar as prestacións de fármacos contra o tumor administrados aos pacientes de melanoma.
Segundo expoñen os autores do traballo, o novo láser pode “analizar” un litro de sangue nunha hora en busca de células tumorais, unha velocidade moito maior que dispositivos anteriores. E Science apunta a que nese tempo, o láser pode atopar unha única CTC nun litro de sangue, o que significa tamén que é 1.000 veces máis sensible ca outros métodos.
Referencia: In vivo liquid biopsy using Cytophone platform for photoacoustic detection of circulating tumor cells in patients with melanoma (Publicado en Science Traslational Medicine).