O sector sanitario non é alleo á chamada cuarta revolución industrial que está en marcha en todo o mundo coa explosión da intelixencia artificial (IA). Galicia conta con distintos proxectos en marcha neste terreo que —segundo explica o subdirector xeral de Sistemas e Tecnoloxías da Información do Sergas, Benigno Rosón— vai ter melloras importantes para os pacientes no futuro próximo. Sobre todo, no que se refire á axilidade nos diagnósticos e a eficiencia nos tratamentos.
“Dende hai tempo sabemos que a IA é unha tecnoloxía robusta e que funciona, e por iso se está a utilizar e a regular en todo o mundo. O obxectivo final é beneficiar os pacientes”, indica Rosón. Tamén destaca como liñas nas que se está a traballar: a integración dos sistemas de IA na sanidade pública para o apoios aos procesos diagnósticos, avanzar na xestión masiva de datos e o tratamento de imaxes médicas, e a xeración de alertas para os profesionais.
Entre as iniciativas que xa se están a desenvolver en Galicia, Rosón apunta ao gran investimento realizado para dixitalizar a imaxe patolóxica, o uso dos cribados para mellorar as posibilidades de diagnóstico e o emprego de algoritmos para axudar a identificar con máis precisión as enfermidades raras. A dispoñibllidade de inxentes cantidades de datos, o incremento das capacidades de procesamento e almacenamento das computadoras e o desenvolvemento de algoritmos que xeren patróns comúns e lles dean sentido son tres elementos clave que incidirán na detección precoz, o diagnóstico e o tratamento de enfermidades.
Historia clínica electrónica
Ademais, un dos puntos a destacar na estratexia do Sergas no uso da IA é a súa aplicación na Historia Clínica Electrónica, co obxectivo de contar co maior número de datos posibles sobre os pacientes para axudar aos profesionais sanitarios a realizar os diagnósticos e tratamentos máis axeitados. Este sistema permite integrar oa datos xerados en todos os centros sanitarios galegos, xerando 400.000 rexistros ao día e preto de 150 millóns de datos ao ano.
“A mellor IA é a que dun xeito transparente e inocuo mellora o servizo ao cidadán que, de cara ao futuro, vai notar máis axilidade no sistema sanitario para diagnosticalo, terá unha maior seguridade nese diagnóstico. A IA vai moi ligada á eficiencia e o paciente tamén o vai notar ao aplicar a autoaxuda no manexo das súas patoloxías”, indica Rosón, que deixa tamén moi claro que estas novas tecnoloxías sempre van ser un apoio para o profesional sanitario, que será sempre o encargado de tomar a última decisión.
O Plan Estratéxico de Transformación e Saúde Dixital da Consellería de Sanidade 2023 e 2026 conta con varias liñas de actuación nos que os proxectos de IA están moi presentes e cara aos próximos anos os investimentos a realizar pola Xunta de Galicia neste terreo superarán os 200 millóns de euros.
