A implantación da ‘Estratexia de Oncoloxía de Precisión’ na rede do Sergas durante o próximo ano 2024 permitirá avanzar no tratamento personalizado do cancro nos pacientes de toda Galicia. Os obxectivos e as claves desta estratexia presentáronse hai algunhas semanas nunha xornada celebrada en Santiago na que estiveron presentes autoridades e científicos de diversas partes de España, Europa e Estados Unidos, que debatiron sobre a evolución da medicina de precisión nos próximos anos.
Durante a xornada o director xeral de Asistencia Sanitaria da Xunta, Jorge Aboal, detallou os obxectivos a conseguir coa Estratexia de Oncoloxía de Precisión na rede do Sergas: reducir o impacto na poboación da enfermidade, facilitar o acceso temperán e igualitario á mellor opción de diagnóstico molecular e terapia dirixida, implantar solucións integrais e sostibles e facilitar o acceso a coñecementos e terapias na fronteira da ciencia.
Entre as actuacións para conseguir estes obxectivos destaca a creación dunha estrutura colaborativa en rede que promoverá a participación das distintas áreas sanitarias galegas na posta en marcha e desenvolvemento desta estratexia. Ademais, se está a constituír unha Comisión Molecular de Tumores Central de Galicia que permitirá traballar de xeito sincronizado en toda a comunidade.
Outra das ferramentas claves desta estratexia é a posta en marcha dunha rede de laboratorios de análise xenético-molecular para establecer unha carteira de biomarcadores á que poderán ter acceso todos os cidadáns galegos. Tamén haberá unha rede deslocalizada de coñecemento especializado, que permitirá aos profesionais do Sergas engadir coñecemento dende o seu posto de traballo.
Co obxectivo final de ofrecer o mellor tratamento personalizado a cada un dos pacientes, está prevista a posta en marcha no primeiro semestre de 2024 do centro de produción de medicamentos CAR-T e doutras terapias celulares en Santiago e a apertura dun centro de protonterapia. Ademais, vanse potenciar a realización de ensaios clínicos e os plans de formación dos profesionais sanitarios no ámbito da medicina de precisión. Finalmente, as infraestruturas TIC e a xestión de datos servirán de apoio para apoiar a medicina de precisión.
Aboal destacou que a elaboración da Estratexia Oncolóxica de Precisión de Galicia se fixo prestando especial atención ás principais estratexias europeas de análise molecular que se están a desenvolver en distintos puntos de Europa. Ademais sinalou que foi moi importante a participación dos distintos grupos de investigación sobre o cancro existentes en Galicia.
Personalizar os tratamentos
Durante a súa intervención na xornada desenvolvida en Santiago o presidente da Xunta, Alfonso Rueda, destacou que o obxectivo final é “poñerlle nome e apelidos a cada tumor, entender como se producen, como evolucionan e como se pode loitar contra eles”. Grazas á estratexia desenvolvida polo Sergas será posible impulsar o diagnóstico molecular, as terapias dirixidas para personalizar os tratamentos e o acceso a terapias innovadoras. Deste xeito, os profesionais sanitarios poderán establecer decisións terapéuticas personalizadas en función das características moleculares de cada tumor.
Aboal apuntou que o desenvolvemento desta Estratexia Oncolóxica de Precisión nos próximos anos vai supoñer “un antes e un despois” na sanidade galega e permitirá seguir avanzando para conseguir os obxectivos marcados pola Medicina 5P: Preventiva, Preditiva, Personalizada/Precisión, Participativa e Poboacional.
