A ministra de Sanidade, Carolina Darias, acaba de anunciar ao abeiro do Consello de Ministros que o próximo 7 de febreiro aprobarase a obrigatoriedade de uso das máscaras do transporte público. A medida entrará en vigor ao día seguinte, cando se aprobe no Boletín Oficial do Estado (BOE). De todas formas, haberá espazos nos que a máscara continúe a ser obrigatoria. De momento, manterase en hospitais e centros de saúde e sociosanitarios como ópticas, farmacias e clínicas dentais. Segundo informou a ministra, tamén se seguirá empregando no persoal e visitas nas residencias.
A noticia salta un día despois de que Fernando Simón, o epidemiólogo do Centro de Alertas e Emerxencias Sanitarias e principal referencia durante a pandemia, asegurase que as máscaras tiñan pronta data de caducidade en taxis, autobuses, metro e demais medios de transporte. Confirmou que a proposta estaba sobre a mesa, e que se levaría a cabo nas vindeiras semanas, pero sen concretar unha data. A demora na decisión debeuse á prudencia: estamos na temporada das infeccións agudas, que remata en marzo. Ademais, a situación de China, cun aumento exponencial de casos, obrigou os expertos a poñer os ollos no xigante asiático.
As voces galegas tamén levan un tempo reclamando o fin da obrigatoriedade das máscaras no transporte público. O epidemiólogo e profesor emérito da Universidade de Santiago Juan Gestal declaraba nunha entrevista realizada en GCiencia o seguinte: “Fai falla que retire xa a obrigatoriedade do uso da máscara nos medios de transporte, non ten sentido mantela, así como nas farmacias e ópticas. Bastaría de momento coa obrigatoriedade nos centros sanitarios. Non estamos xa nunha situación de pandemia”.
