Galicia, xunto con outras rexións do norte de España, conta cun tipo de glaucoma máis frecuente e agresivo, o glaucoma pseudoexfoliativo, relacionado cunha mutación xenética. Así o pon de manifesto o Instituto Oftalmolóxico Gómez-Ulla no marco da semana mundial do glaucoma, efeméride que se conmemora o 12 de marzo.
Este glaucoma pseudoexfoliativo está considerado máis agresivo que outros tipos xa que produce un maior aumento da presión ocular, co risco de producir un maior dano no nervio óptico ou con maior rapidez, afectando en maior medida á visión dos pacientes. Nun estudo realizado en poboación galega, atopouse unha prevalencia media de pseudoexfoliación dun 6,5% en pacientes maiores de 40 anos, unha porcentaxe que aumentaba coa idade. De feito, atopouse material pseudoexfoliativo en case un terzo dos pacientes maiores de 80 anos.
Trátase dunha patoloxía silenciosa que non adoita presentar sintomatoloxía ata chegar a unha fase avanzada
A enfermidade de glaucoma é unha das primeiras causas de cegueira evitable no mundo. Só en Galicia afecta a unhas 70.000 persoas, estando a metade delas sen diagnosticar posto que se trata dunha patoloxía silenciosa que non adoita presentar sintomatoloxía nin perda da capacidade visual ata que xa está nunha fase moi avanzada. Por isto, os expertos insisten na importancia da revisión oftalmolóxica preventiva anual, o que permite detectalo nunha fase inicial e non cando xa existe unha afectación irreversible do campo visual.
Características
Este glaucoma pseudoexfoliativo pode ser tanto de ángulo aberto como de ángulo pechado e está orixinado pola síndrome de pseudoexfoliación, enfermidade detectable pola presenza de proteínas anormais que se depositan e acumulan en todas as estruturas que están recubertas polo humor acuoso. Trátase dun glaucoma asociado cunha importante carga xenética relacionada co xene LOXL1 e factores ambientais, como a ubicación xeográfica.
Ao inicio, a afectación adoita ser unilateral e non adoita causar síntomas. Non obstante, co paso do tempo, acaba afectando a ambos ollos, aínda que en grados dispares. Ao tratarse dun glaucoma máis agresivo, o paciente pode percibir o daño no campo visual secundario cun menor tempo de evolución da enfermidade que os pacientes que padecen outras formas de glaucoma.
Este glaucoma provoca picos de presión intraocular de forma crónica que só poden tratarse mediante fármacos
Outra das características presentes no glaucoma pseudoexfoliativo son os picos de presión intraocular. Estas variacións de presión poden ser tanto ou máis perigosas para o nervio óptico que unha presión elevada pero estable.
Tratamento
Actualmente, o único tratamento dispoñible para esta enfermidade é unha baixada de presión ocular mediante fármacos. Nunha primeira avaliación, o oftalmólogo estabelece unha presión diana, aquela na que non seguirá progresando o dano, baseándose na idade, o tipo de glaucoma, a gravidade e na velocidade de progresión.
É unha patoloxía crónica, polo que este é un tratamento de longa duración para o que só existen catro tipos de medicamentos aprobados a nivel nacional. Actualmente, os investigadores continúan abrindo vías e realizando novos ensaios clínicos a nivel internacional para avaliar a eficacia e a seguridade de novos fármacos.
