Investigadores do Instituto de Oncoloxía do Hospital Vall d’Hebron (VHIO) veñen de demostrar que a Omomyc, unha proteína terapéutica que funciona para atacar tumores primarios, é tamén eficaz para a metástase en cancro de mama. Os resultados do estudo foron publicados en Cancer Research Communications, unha revista da Asociación Americana de Investigación do Cancro (AACR).
Dende hai tempo sábese que a familia de xenes MYC xoga un papel importante no desenvolvemento de moitos tipos de tumores. Non obstante, hai certa controversia sobre como pode afectar ao desenvolvemento da metástase, existindo incluso algúns estudos que suxiren que a inhibición de MYC podería potenciala.
Omomyc é unha proteína que funciona para atacar tumores primarios
Este novo traballo achega, por primeira vez, luz sobre a cuestión. En concreto, os investigadores analizaron a eficacia de Omomyc, que inhibe a MYC, para controlar a progresión do cancro de mama metastásico. O estudo realizouse en diferentes experimentos, tanto in vitro como in vivo en modelos de ratos, para coñecer en profundidade o impacto da proteína. Para o equipo, a resposta foi moi positiva, comprobando en todos os casos a actividade antimetastásica de Omomyc, en contra do que se pensaba.
Os experimentos levados a cabo permitiron ver aos investigadores que, en ratos modificados xeneticamente, Omomyc era capaz de facer que o tumor primario medrara menos, pero que tamén impactaba na evolución das metástases, facéndoas desaparecer nalgúns casos. Ao administrar a proteína por vía intravenosa, os resultados tamén foron positivos, constatando unha diminución do crecemento do tumor e prolongando singificativamente a supervivencia dos animais.
As chaves da proteína
A investigación oncolóxica xa manifestou a importancia do xene MYC no desenvolvemento de practicamente todos os tumores sólidos. Desta forma, Laura Soucek, xefa do Grupo de Modelización de Terapias Antitumorais e investigadora deste estudo, desenvolveu Omomyc, unha miniproteína capaz de inhibir o xene.
En maio do ano pasado iniciouse un ensaio clínico en pacientes baseado nesta proteína, tras a constatación da súa potente actividade antitumoral en múltiples liñas de células e modelos de cancro en rato, independentemente do seu tecido de orixe e as súas mutacións. Non obstante, ata o de agora, todos os traballos de investigación realizados con este fámarco se centraran en tumores primarios, non na enfermidade metastásica.
Os experimentos leváronse a cabo en ratos modificados xeneticamente
As metástases son xeneticamente inestables, o que significa que a información do tumor primario dun paciente pode non reflictir con precisión as metástases, que ademais poden varias dunhas a outras. Isto supón unha importante barreira para as terapias dirixidas.
Tratamento en pacientes
Esta nova investigación aínda non se levou a cabo en pacientes, pero aínda así o grupo de investigación quixo analizar a posible repercusión da aplicación de Omomyc. Para isto, analizáronse bases de datos de doentes, nas que se puido comprobar que aquelas con cancro de mama que presentaban sobreexpresión dos xenes que bloquea a proteína tiñan unha supervivencia máis baixa.
Por este motivo, os investigadores se mostran optimistas e pensan que poderían mellorar a taxa se estas pacientes puidesen tratase co seu fármaco.
Referencia: MYC inhibition halts metastatic breast cancer progression by blocking growth, invasion and seeding (Publicado en Cancer Res Commun)