Unha mostra da vacina Sputnik-V desenvolvida en Rusia.

Europa abre o proceso para aprobar a vacina rusa ‘Sputnik V’

Os ensaios clínicos e estudos como o publicado por The Lancet avalían esta vacina creada polo Centro Nacional de Epidemioloxía Gamaleya de Rusia

A Axencia Europea do Medicamento (EMA) anunciou o comezo dunha ‘revisión continua’ de Sputnik-V, a vacina rusa contra a Covid-19. Este proceso consiste nunha análise en tempo real dos datos sobre a súa seguridade, a súa eficacia e a súa calidade, e podería conducir a autorizar o uso deste fármaco na Unión Europea (UE).

Nun comunicado, o regulador europeo explicou que a decisión de dar este paso “está baseada nos resultados dos estudos de laboratorio e os estudos clínicos en adultos” que a farmacéutica rusa publicou e compartiu cos científicos europeos da EMA.

A solicitude para que a axencia comece a estudar este fármaco, denominado de xeito técnico Gam-COVID-Vac, parte do laboratorio alemán R-Pharm Germany GmbH. Esta vacina foi desenvolta polo Centro Nacional de Epidemioloxía e Microbioloxía Gamaleya de Rusia.

Segundo sinala a EMA, Sputnik V “desencadea a produción de anticorpos e células inmunes que se dirixen ao SARS-CoV-2 e poden axudar a protexer ás persoas vacinadas contra a Covid-19”. A axencia avaliará o cumprimento desta vacina cos estándares habituais da UE en canto a eficacia, seguridade e calidade, e decidirá se os beneficios superan aos riscos.

Sen data prevista

A anunciada revisión continuará ata que haxa información dabondo dispoñible para presentar unha solicitude formal de autorización de comercialización na UE, algo para o que a EMA non ten un calendario fixado aínda. Segundo estiman, “debería levar menos tempo do normal” avaliar esta solicitude, grazas ao traballo xa realizado durante a revisión continua.

Sputnik V súmase así á lista de vacinas que tamén se atopan nun proceso de avaliación continua e que aínda non teñen data para solicitar unha autorización de uso, como o son as desenvolvidas polo laboratorio alemán CureVac e o estadounidense Novavax.

Quen xa presentou unha solicitude formal ante a EMA para que autorice unha licenza de uso condicional foi Janssen, a filial belga da estadounidense Johnson & Johnson. Espérase que sexa autorizada o vindeiro 11 de marzo. De acadalo, pasaría a ser a cuarta vacina dispoñible na UE, xunto con Pfizer/BioNtech, Moderna e AstraZeneca.

Así funciona a vacina Sputnik-V creada en Rusia

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.