Moita xente goza dunha cunca de café (ou catro) para animarse durante o día e unha nova investigación ofrece probas de que a popular bebida pode traer numerosos beneficios, incluíndo a posibilidade de gozar dunha vida máis longa e saudable, segundo suxiren os investigadores. Un equipo da Universidade de Coimbra en Portugal examinou 85 estudos anteriores nos que participaron persoas de Europa, América, Australia e Asia, analizando a relación do café coas taxas de mortalidade e os indicadores da saúde.
En conxunto, a súa análise suxire que beber ao redor de tres cuncas de café ao día está relacionado con 1,84 anos adicionais de vida útil da persoa media. Ademais, o seu consumo regular tamén se asocia a un aumento da saúde (tempo de vida sen enfermidades graves).
“En ocasións, as recomendacións clínicas tradicionais pasaron por alto o papel do café no envellecemento saudable”, di o neurocientífico Rodrigo Cunha da Universidade de Coimbra.
“A nosa revisión subliña o papel que pode desempeñar o consumo regular e moderado de café na mediación contra os mecanismos biolóxicos que de xeito natural retardan ou fallan a medida que envellecemos, provocando unha serie de posibles problemas de saúde e comorbilidades –presenza simultánea de dúas ou máis doenzas nunha mesma persoa”, afirma Cunha.
Moitas variables a ter en conta
Con tantos estudos incluídos neste traballo, existen moitas variables, como os tipos de café consumidos, a demografía das persoas implicadas e a duración dos mesmos. “Os beneficios diferirán entre os individuos e é probable que non se deban só ao café”, apunta.
Non obstante, hai unha lixeira pero notable relación nestes estudos entre beber café e mellorar a saúde, aseguran os expertos. “Con centos de miles de voluntarios implicados en total, a amplitude da investigación é un dos seus puntos fortes”.
Analizáronse indicadores de saúde como a inflamación e o metabolismo, mentres que os investigadores tamén tomaron en consideración factores como o tabaquismo e o consumo de alcohol para illar mellor os efectos do consumo de café.
“A súa inxestión parece asociada a unha preservación das funcións musculares, cardiovasculares, mentais e do sistema inmunitario“, escriben no artigo publicado en Ageing Research Reviews , “e parece inversamente asociado coa incidencia das enfermidades máis frecuentes que afectan aos anciáns como as cardiovasculares e respiratorias, os accidentes cerebrovasculares, algúns cancros, diabetes, demencia, depresión ou fraxilidade”.
Consumo autodeclarado
Malia isto, destacan que é importante ter en conta que moitos dos estudos avaliados implicaron o consumo de café autodeclarado e a investigación foi financiada polo Instituto de Información Científica do Café, unha organización sen ánimo de lucro apoiada polas principais compañías internacionais de café.
Isto tampouco demostra unha relación directa de causa e efecto: “Hai moitos outros factores potencialmente implicados para dicir que o café e a cafeína son os únicos responsables dunha vida máis longa e dunha mellor saúde”.
Non obstante, e segundo os expertos, estas estatísticas encaixan coas investigacións anteriores, que mostran como o café pode protexer contra as enfermidades cardíacas, compensar os efectos negativos de estar sentado e engadir anos a vida.
“Sabemos que a poboación mundial envellece máis rápido que nunca, polo que é cada vez máis importante explorar intervencións dietéticas que poidan permitir que as persoas non só vivan máis, senón tamén máis saudables”, di Cunha.
Referencia: Impact of coffee intake on human aging: Epidemiology and cellular mechanisms (Publicado en Aging Research Reviews )
