O cancro de mama é un dos tumores máis diagnosticados no mundo. No obstante, existen algunhas diferenzas segundo a súa tipoloxía. En concreto, os cancros de mama ER negativos reciben o seu nome por carecer de receptores de estróxeno (ER), polo que non responden á terapia hormonal. Alén, existen os denominados cancros triplo negativos, que non só carecen de ER, senón tamén de receptores de proxesterona e receptores HER2.
Agora, investigadores do Instituto Karolinska de Suecia veñen de identificar unha proteína que protexe contra o crecemento de tumores de mama e que pode vincularse cun mellor prognóstico nas pacientes. Os resultados do estudo, publicado na revista Nature Communications, poderían contribuír ao desenvolvemento de novas terapias para os tipos de cancro de mama máis difíciles de tratar.
O estudo
O equipo científico logrou identificar un mecanismo novidoso polo cal a proteína GIT1 regula a denominada sinalización de Notch, que afecta o inicio e desenvolvemento do cancro de mama ER negativo.
Esta sinalización é un mecanismo de comunicación célula a célula conservado evolutivamente que regula as decisións do destino celular na maioría dos órganos do corpo e en diferentes pasos durante o desenvolvemento celular. A sinalización hiperactiva de Notch en pacientes con cancro de mama xa se relacionara en estudos previos cun peor prognóstico.
A investigación levouse a cabo con células tumorais de pacientes con cancro de mama, mostrando que os niveis altos de GIT1 inhibían a sinalización de Notch e protexían contra o crecemento tumoral, mentres que os niveis baixos desta proteína aumentaban o crecemento do cancro.
Por outra banda, os tumores ER negativos tiñan niveis máis baixos de GIT1 que os que si contan con receptores estroxénicos. Ademais, os resultados tamén mostraron que estas pacientes tiñan un mellor prognóstico cando os seus niveis da proteína eran máis altos.
Referencia: GIT1 protects against breast cancer growth through negative regulation of Notch (Publicado en Nature Communications)
