Un estudo multicéntrico liderado polo Hospital Universitario de Bellvitge (HUB) e o Grupo de Investigación en Enfermidades Neurolóxicas e Neuroxenéticas do Instituto de Investigación Biomédica de Bellvitge (IDIBELL) no que participaron 18 unidades de Cefaleas de hospitais de toda España determina que os fármacos anti-CGRP tamén son efectivos e seguros en maiores de 65 anos.
Dispoñer desa información era unha materia pendente, xa que este perfil de paciente estaba excluído dos ensaios clínicos. Agora demostrouse que este tratamento representa unha opción terapéutica segura e eficaz para o manexo da xaqueca crónica nestes pacientes.
Os anticorpos anti-CGRP son fármacos dispoñibles desde 2019 que precisamente bloquean o CGRP, unha proteína implicada nos procesos de dor e vasodilatación asociados á xaqueca. Pola súa actuación específica sobre a proteína son fármacos moi ben tolerados e eficaces sen efectos a outros niveis (excepto estrinximento, porque a proteína tamén se atopa nas neuronas do aparello dixestivo), xa que bloquean a vía da dor asociada á xaqueca.
Os resultados do estudo multicéntrico, publicados este mes de xuño na revista científica The Journal of Headache and Pain, determinan que o 60% dos pacientes presentou unha redución de máis do 50% de días que sufrían xaqueca. Realizouse un estudo observacional de vida real, cunha mostra de 162 pacientes, o 74,1% dos cales eran mulleres.
Despois de seis meses de tratamento con calquera anticorpo monoclonal (erenumab, galcanezumab e fremanezumab), os pacientes pasaron dunha media de 18 días mensuais de xaqueca a tan só oito. Estes resultados son equiparables ao que xa se coñecía sobre os anticorpos monoclonais na poboación xeral. En canto aos efectos adversos nos maiores de 65 anos, detectáronse menos coa administración de fremanezumab.
En paralelo, as frecuencias de cefalea e o consumo de analxésicos da mostra de pacientes do estudo liderado polo Hospital de Bellvitge reducíronse significativamente e as escalas de avaliación clínica melloraron.
Arsenal terapéutico para unha doenza crónica
“A xaqueca é unha enfermidade xenética que fluctúa ao longo da vida. Nos pacientes anciáns, en quen non se puido controlar adecuadamente, existe un maior risco de cronificación polo tempo de evolución, por fallar a máis tratamentos preventivos e pola comorbilidade asociada”, explica Albert Muñoz-Vendrell, neurólogo da Unidade de Cefaleas do Hospital de Bellvitge e investigador do IDIBELL.
Ata o de agora, as persoas maiores de 65 anos non se incluíron nos ensaios clínicos dos anticorpos monoclonais, polo que se descoñecía se estes eran igual de eficaces que para os pacientes máis novos.
“A hipótese era que poderían sufrir máis problemas de seguridade, xa que o CGRP é vasodilatador e, teoricamente, se se bloquea a proteína, podía haber un aumento do risco cardiovascular en pacientes anciáns con hipertensión, dislipemia, ou antecedentes de eventos cardiovasculares previos”, segundo o neurólogo. Este último estudo despexa as dúbidas pendentes sobre estes tratamentos que amplían a abordaxe actual da xaqueca, con boa tolerancia e seguridade.
Só en Cataluña, o equipo calcula que preto de 900.000 persoas sofren xaqueca. Son, sobre todo, mulleres en idades novas. Aínda que a prevalencia é menor nos maiores de 65 anos, a comorbilidade e cronificación poden supoñer unha limitación na prescrición e resposta ao tratamento. O impacto da xaqueca na calidade de vida dos pacientes é moi grave, xa que os ataques de xaqueca supoñen unha incapacidade case completa, porque os síntomas non se limitan á dor de cabeza, senón que tamén asocia intolerancia a estímulos externos, actividade física e náuseas.
De feito, a OMS considéraa a sexta enfermidade máis incapacitante do mundo e é a segunda causa de discapacidade entre as enfermidades neurolóxicas, soamente por detrás do ictus.
Referencia: Effectiveness and safety of anti-CGRP monoclonal antibodies in patients over 65 years: a real-life multicentre analysis of 162 patients (Publicado en The Journal of Headache and Pain)
