A Consellería de Sanidade informou este martes, segundo recolle a axencia Europa Press, dun abrocho de hepatite A no CEIP Xesús Gomar de Lalín. Desde este luns, o centro de saúde da vila xa está reforzando o servizo de vacinación contra a doenza, recomendada aos escolares, docentes e familiares directos do centro, xa que a inmunización desta enfermidade non é habitual nos adultos e non está incluída no calendario infantil (que sí inclúe a hepatite B).
En concreto, o Sergas destina tres profesionais de enfermería a realizar a vacinación en quendas de mañá e tarde desde este luns ata o 28 de febreiro. Sanidade explicou que, tras a comunicación de “varios casos de hepatite A en alumnos” do CEIP Xesús Golmar, recomendou a vacinación aos escolares e profesores dos cursos afectados, así como aos seus contactos máis próximos.
O abrocho prodúcese despois de ter detectado un caso a finais de xaneiro, segundo recolleu no seu momento La Voz de Galicia. O pasado venres, a Xefatura Territorial da Consellería de Sanidade en Pontevedra remitiu unha carta aos familiares e docentes a través da dirección do centro escolar na que especificaba a recomendación da vacinación e outra información sobre a enfermidade, sintomatoloxía e como previr o contaxio.
Ademais, este luns tivo lugar unha reunión de escolares, docentes e familias con persoal de Saúde Pública e do centro de saúde da localidade “para aclarar todas as dúbidas”, segundo a Consellería.
Síntomas da hepatite A
Esta doenza ocasiona unha inflamación do fígado causada pola infección do virus da hepatite A (VHA). O virus adoita transmitirse por vía oral (auga e alimentos contaminados) pero tamén se pode transmitir, a diferenza das outras variantes habituais (B e C, que se transmiten a través do sangue e agullas ou materiais cortantes contaminados ou mediante relacións sexuais), por vía fecal-oral, mediante prácticas sexuais como o sexo oral (boca-pene ou boca-ano) con persoas enfermas con hepatite A.
Entre os síntomas, segundo informa o web do Sergas, están o cansazo extremo, ouriño escuros e deposicións branquexadas, diarrea ou dor abdominal, náuseas, proído na pel e ictericia (cor amarela na pel e parte branca dos ollos).
A duración dos síntomas é variable, puntualiza Sanidade, de entre unha e dúas semanas, ata “varios meses nas formas graves”. “Non se sabe que se produza infección crónica”, matiza. Porén, a doenza adoita ter un impacto “moi leve” nos nenos, sendo máis grave en adultos.
Como medidas de precaución, recoméndase manter unha boa hixiene nas mans despois de ir ao baño e antes e despois de consumir alimentos.
Nos países desenvolvidos, coa mellora das condicións hixiénicas, reduciuse moito o contaxio polo consumo de auga ou alimentos contaminados, que aínda son a principal causa de contaxio noutras zonas do mundo. Así, en Galicia e no resto dos países desenvolvidos, o modo de transmisión máis habitual son as relacións sexuais orais-anais e orais-xenitais.
Abrocho de hepatite A en 2018
En Galicia produciuse en 2016 un abrocho de hepatite A que acabou controlado en 2018. Os casos localizáronse sobre todo en homes que mantiñan sexo con homes (HSH), con idades comprendidas entre 25 e 44 anos, grupo no que se concentraron o 85% dos casos segundo informaba o Sergas en setembro de 2018.
No caso de manter relacións sexuais de risco, recoméndase lavar as mans antes e despois, así como utilizar medidas de protección adecuadas ante práticas susceptibles de contaxio, como luvas de látex e preservativos, así como cubrir con estes calquera obxecto que se use durante as relacións.
