O levantamento das restricións e a fin das máscaras nos interiores —agás en hospitais, residencias e outros espazos sociosanitarios— permitiunos recuperar a vella normalidade. O cambio na estratexia de vixilancia e control fronte á covid, que implementou o Ministerio de Sanidade o 28 de marzo, cambiou por completo o panorama e instou a convivir co virus. Agora a atención está posta nas persoas vulnerables e nos casos graves. É dicir, aqueles que requiren de hospitalización. Se atendemos ao último comunicado emitido pola Consellería de Sanidade, o número de persoas ingresadas de covid en Galicia é de 676. Porén, os datos deben interpretarse cautelosamente: non todos están hospitalizados por covid, senón que a meirande parte deles ingresaron por outros motivos.
Segundo os datos facilitados polo Sergas a GCiencia, o xoves 21 de abril —con 623 hospitalizados covid— só un 38,3% estaban ingresados por complicacións derivadas do coronavirus. Polo tanto, a meirande parte deles, un 61,7%, estaban no hospital con covid. É dicir, acudiron ao centro por outro motivo —por exemplo, unha cirurxía— e deron positivo en SARS-CoV-2. Estes datos dan outra perspectiva sobre o número total de ingresados covid, tal e como explicaba recentemente o profesor emérito de Saúde Pública da Universidade de Santiago de Comspostela (USC), Juan Gestal, a GCiencia. De feito, tal e como declaraba o 13 de abril, máis do 95% dos casos de covid actuais “son leves ou asintomáticos”.
Galicia achégase aos 600 hospitalizados de covid: debemos preocuparnos?
A Consellería de Sanidade tamén se pronunciou recentemente sobre o asunto. O conselleiro Julio García Comesaña apuntou a “certa tranquilidade” ante as cifras de ocupación hospitalaria de covid, malia que levan dúas semanas superando os 600 casos e, incluso, chegando aos 700. A este respecto, Comesaña recoñeceu que estamos “nun momento de prudencia” e cunha incidencia acumulada “moi alta”, pero que tanto os ingresos como as UCIS están nunha situación “contida”. Nas súas declaracións aos medios, realizadas o sábado en Silleda, puntualizou que “máis da metade” dos pacientes que están ingresados de covid, “non están ingresados pola covid, senón coa covid”. Malia esta interpretación máis positiva dos resultados, o conselleiro pediu “prudencia” e recordou que no ámbito sanitario séguese a usar a máscara.
A segunda taxa de ocupación máis alta de España
Por outro lado, o Ministerio de Sanidade tamén publica informes periódicos nos que informa sobre a situación epidemiolóxica das diferentes comunidades autónomas. Na súa última actualización, do venres 22 de abril, indícase que a taxa de ocupación por 100.000 habitantes en Galicia —en relación á capacidade asistencial dos hospitais— é de 25,08, a segunda máis alta de España, superada só por Asturias (36,77). Unhas cifras que se sitúan moi por enriba da media nacional, que está no 12,91. En relación á taxa de ocupación por UCI, a cifra mellora: está nun 0,48, bastante por debaixo da media nacional (0,72).
Finalmente, estes datos reflíctense na porcentaxe de camas covid ocupadas. En Galicia está nun 8,02%, tamén a segunda porcentaxe máis alta do país que só supera Asturias, cun 10,57%. A media española está bastante máis baixa, nun 4,94%. De novo, as cifras máis positivas veñen en relación ás unidades de coidados intensivos, nas que a porcentaxe de camas ocupadas en Galicia se sitúa nun 1,74%, bastante por debaixo da media española, nun 3,76%.