Business Factory Food (BFFood), aceleradora do sector alimentario de Galicia, celebra a súa IV Edición, convocatoria pública na que busca atraer, identificar, seleccionar e impulsar proxectos innovadores de emprendemento, tanto nacionais como internacionais, para facer fronte aos retos do sector alimentario nunha contorna global. A BFFood está impulsada pola Xunta de Galicia e dinamizada polo Clúster Alimentario de Galicia (Clusaga) e empresas de referencia na industria alimentaria. O seu obxectivo é implementar programas de apoio ao emprendemento e consolidación de proxectos especializados no sector alimentario e a súa transformación en empresas innovadoras.
Para esta nova edición, terá lugar a xornada informativa Infoday, organizada en colaboración polo Clúster Alimentario de Galicia e FEUGA, entidade que xa formara parte do Comité Téctico e entidade colaboradora en anos anteriores e que agora pasa a ser promotora do mesmo. O evento terá lugar o próximo 3 de maio, entre as 10.00 h e as 12.00 h, no Edificio FEUGA do Campus Vida de Santiago de Compostela. Nel, reuniranse autoridades, grandes empresas e startups representantes da BFFood para realizar unha retrospectiva de edicións anteriores e afondar nos programas e recursos que ofrece a BFFood na súa IV Edición. Ademais, durante a xornada daranse todos os detalles relativos á presentación dos proxectos dentro do plazo establecido, que se manterá aberto ata o 13 de maio.
O programa do Infoday
O acto comezará cunha benvida, representada por Clusaga, XesGalicia e FEUGA, seguida pola presentación do informe de tendencias Agrifood 2022, realizado pola Fundación Europea INTEC. O portavoz será Juan Francisco Delgado, vicepresidente executivo da Fundación, quen explicará as últimas tendencias e proxeccións máis importantes do sector agroalimentario.
Posteriormente, representantes de dúas empresas mentoras da BFFood, CEAMSA e Hijos de Rivera, e os CEO dos proxectos de éxito de pasadas edicións, ODS Protein e Galinsect, integrarán a mesa redonda “BFFood. Retos e solucións para a alimentación do futuro”, que precederá á mesa de “Oportunidades para o crecemento e a valorización do coñecemento”, integrada por representantes de BFFood, FEUGA, XesGalicia e Unirisco.
A xornada pecharase coa presentación dos detalles da IV Edición da aceleradora, da man de representantes de Clusaga e GAIN. Para terminar darase paso ao coffee networking.
A IV Edición
BFFood manterá aberto o prazo de presentación de proxectos para formar parte da súa IV Edición ata o 13 de maio ás 14.00 h. Poderá presentarse a esta candidatura calquera proxecto innovador de emprendemento, tanto nacional como internacional, que dea resposta aos retos que expón o sector alimentario actual.
Ao longo das súas tres edicións anteriores, a Business Factory Food, impulsou un total de 25 proxectos, das 187 candidaturas recibidas, tanto nacionais como internacionais. Este ano seleccionarán ata 6 iniciativas para o seu programa de aceleración, de 9 meses de duración, e 6 proxectos para o de consolidación, de 12 meses de duración. O programa de aceleración está centrado en proxectos emprendedores na súa fase inicial, que estean desenvolvendo ou desenvolvesen un produto ou servizo mínimo viable e que esbozasen un modelo de negocio. No de consolidación, buscan empresas xa constituídas cun produto ou servizo definido e primeiras vendas xa realizadas.
Estas iniciativas innovadoras optarán a programas de formación especializada, coaching, acceso a infraestruturas científico-técnicas e servizos avanzados, mentoría dos líderes do sector, financiación directa e acceso a investimento, así como a unha rede de networking no ecosistema de innovación alimentario. Cada un dos proxectos conta cun mentor específico pertencente a unha empresa líder do sector alimentario que guiará e facilitará o desenvolvemento da iniciativa en cuestión no ecosistema do sector. Ademais, os proxectos terán acceso a un financiamento específico en forma de subvencións a fondo perdido e préstamos participativos, para favorecer o seu despegue e consolidación.
