Luns 4 Marzo 2024

Curada a última paciente dunha das maiores epidemias de ébola no Congo

A OMS anuncia que despois de máis dun ano loitando contra a doenza, xa non existe ningunha persoa afectada no país centroafricano

Chámase Masiko Muhaso, e esta semana saíu dun centro de tratamento situado na cidade congoleña de Beni, ao norte do país, preto da fronteira con Uganda, no medio dunha gran celebración. A festa debíase a que esta muller foi a última paciente que permanecía ingresada pola grave epidemia de ébola que desde hai máis dun ano levaba afectando á República Democrática do Congo (RDC).

O abrocho, declarado en agosto de 2018, é o segundo peor do que existen datos desde a aparición da enfermidade, con 3.444 casos confirmados e 2.264 mortes. O ébola foi identificado por primeira vez en 1976 en dúas vilas de Sudán e o antigo Zaire (hoxe RDC) á beira do río Ebola, que lle deu nome á doenza. En 2014, varios países de África occidental sufriron o maior abrocho  da historia, que acabou con case 30.000 infectados e máis de 11.000 mortos.

Publicidade

Masiko saíu xa curada, pero seguen baixo vixilancia 46 persoas que estiveran en contacto coa paciente para controlar que a doenza non se propague. “Seguiremos atentos durante o resto do período de observación”, expuxeron fontes da OMS. O fin do abrocho, segundo os criterios sanitarios, só pode confirmarse despois de que pasen 42 días desde que o último caso resulte negativo nas probas.

“Aplaudo os esforzos incansables que se fixeron para responder ao abrocho, e estou realmente esperanzado pola noticia de que a última paciente saíu sa do centro de tratamento”, declarou a doutora Matshidiso Moeti, directora rexional da OMS en África. “Pero todavía  non é o final do ébola no Congo, temos que seguir atentos”, engadiu.

O ébola ten unha taxa de letalidade de arredor do 50%, o que o converte nun dos virus máis letais actualmente no planeta. É transmitido ao ser humano por animais salvaxes e propágase na poboación pola transmisión de persoa a persoa por contacto directo con órganos, sangue, secrecións ou outros líquidos corporais de persoas infectadas ou por contacto indirecto con materiais contaminados. Os pacientes son contaxiosos mentres o virus estea presente no sangue.

Os síntomas adoitan ser febre súbita, debilidade intensa, dores musculares, de cabeza e gorxa. A medida que o ébola avanza, é común a aparición de vómitos e diarrea, erupcións cutáneas, deterioro da función dos riles e o fígado e, nalgúns casos, hemorraxias internas e externas.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Por que o cerebro dos vertebrados é tan complexo? A clave está en virus antigos

Uunha secuencia xenética derivada de primitivos retrovirus resulta esencial para producir mielina, a capa que protexe as fibras nerviosas

Europa prorroga 10 anos o glifosato, o herbicida “canceríxeno” usado masivamente en Galicia

É o produto fitosanitario máis eficaz contra as malas herbas, pero numerosos artigos científicos atribúenlle efectos nocivos na saúde das persoas

Pódcast | Os virus e zoonoses do cambio climático

Neste episodio abordamos o papel da crise climática na propagación de patóxenos que fará que teñamos que afrontar novas enfermidades

Estes son os alimentos que conteñen o edulcorante declarado “posiblemente canceríxeno” pola OMS

O aspartamo atópase en miles de produtos que consumimos habitualmente, dende a pasta dentífrica ata as píldoras para a tose