A Consellería de Sanidade trasladou este xoves que a intensidade da gripe está en nivel baixo pero con tendencia crecente. Así o recolle o último Informe de actividade das infeccións respiratorias agudas, que analiza os casos e ingresos hospitalarios durante a segunda semana do ano. Segundo os datos, a taxa de consultas por gripe en atención primaria aumentou un 107%, situándose nas 73,4 citas por 100.000 habitantes. O incremento obsérvase en todos os grupos de idade agás no de 0 a 4 anos. O grupo etario con maior taxa foi de 20 a 59 anos. As consultas aumentaron en todas as áreas sanitarias, especialmente en Ourense, Verín e Barco de Valdeorras.
En canto aos ingresos hospitalarios, na semana do 6 ao 13 de xaneiro de 2025 ingresaron 150 persoas con gripe confirmada, isto é un 27% máis que a semana anterior. No que vai de temporada da gripe notificáronse 481 ingresos, a maioría deles con virus tipo A.
O Plan sanitario de inverno da Xunta desta temporada recolle de a vixilancia epidemiolóxica a través das achegas dunha rede de farmacias sentinela. Desta forma, os datos remitidos á Dirección Xeral de Saúde Pública reflicten que as taxas de dispensación de antigripais e probas de antíxenos minguaron respecto da primeira semana do ano 2025.
O uso de máscara, recomendable en certos grupos
A Dirección Xeral de Saúde Pública recomenda o emprego da máscara aos pacientes con síntomas respiratorios e aos profesionais que os atenden, así como en determinados grupos de risco ou dispositivos asistenciais como poden ser as urxencias hospitalarias.
O informe de actividade das infeccións respiratorias agudas indica que a razón de casos por médico de covid-19 se mantivo estable mentres que a taxa de consultas aumentou un 18,4%.Pola súa banda, no que atinxe ao Virus Respiratorio Sincitial (VRS), a taxa de ingresos no conxunto da poboación foi de 1,6 ingresos por 100.000 habitantes, un dato inferior ao da semana pasada (3,8 ingresos por 100.000 habitantes).
