Únete á nosa canle de Whatsapp
O presidente da Xunta, Alberto Núñez Feijoo, confirmou este domingo que xa son 44 os casos de coronavirus confirmados en residencias de maiores de Galicia. Desde o coñecemento dos primeiros focos a mediados desta semana, son alomenos catro os centros afectados polo SARS-CoV-2, en Caldas de Reis, Santiago, Vigo e Celanova.
Nesta vila ourensá, preocupa o foco da residencia de San Carlos. Unha das usuarias, unha muller de 93 anos, faleceu este venres no hospital de Ourense. Hai outras 24 persoas afectadas (12 usuarias e 12 traballadoras do centro). Segundo recolle eldiario.es, a residenci de maiores de San Carlos ten 58 prazas, das que 12 son concertadas.
O pasado venres, a Consellería de Política Social xa confirmara que había positivos en residencias de Caldas de Reis (un), e nos centros da rede DomusVi de San Lázaro (Santiago) e Barreiro (Vigo). Este domingo, as cifras nestes dous últimos centros xa ascenderon a alomenos 5 en Santiago e 11 en Vigo. En Santiago illouse unha das plantas con 60 usuarios, que segundo a consellería non tiñan síntomas da Covid-19.
A primeira hora da tarde, o presidente do Goberno, Pedro Sánchez, confirmou que se ían intervir as residencias de maiores que estiveran nunha situación complicada para frear a escalada de contaxios.
Hoy @sanidadgob emite una Orden a instancias de @VSocialGob para que todas las residencias de mayores de España que estén desbordadas para enfrentar al COVID-19 puedan recibir auxilio urgente de la @UMEgob. Intervenir en estos centros es una prioridad absoluta para el Gobierno. pic.twitter.com/FENuzdyEEJ
— Vicepresidencia de Derechos Sociales y Agenda 2030 (@VSocialGob) March 22, 2020
Protestas por falta de material
Ante os primeiros casos da doenza nas residencias, o sindicato CIG denunciou a “falta de medidas preventivas” e de material fronte ao virus entre o persoal destas residencias. Outros colectivos reclamaron tamén, segundo recolleu Praza, máis medidas de protección ante a rotación de traballadoras entre residencias.
No marco destas eivas, A Xunta de Galicia remitiuse de novo este domingo a que esta “á espera de recibir o material de protección que anunciara o Ministerio de Sanidad para poder comezar a distribuílo con carácter prioritario a hospitais, centros de saúde e residencias sociosanitarias”.
Os focos nas residencias de maiores son, ata o momento, un dos puntos máis complicados da crise do coronavirus en España. Aínda que as cifras son provisionais e as autoridades sanitarias non facilitaron datos, estímase que máis de 100 usuarios destes centros faleceron debido ao contaxio pola Covid-19.
Os grupos de risco son unha das preocupacións das autoridades sanitarias pola maior letalidade do coronavirus debido ás patoloxías que poden complicar a evolución da doenza. Un dos focos máis importantes ata o momento tivo lugar en Aspronaga, entidade de atención a persoas con discapacidade intelectual que está situado en Oleiros. Un dos seus usuarios, que padecía de doenzas anteriores, faleceu no hospital da Coruña o 13 de marzo despois de ser diagnosticado co SARS-CoV-2.
Máis información:
Galicia achégase aos 600 casos de Covid-19 e soben a nove os falecementos
