A Dirección Xeral de Saúde Pública informa a poboación do protocolo a seguir no caso de sufrir a picadura dunha medusa nas zonas de baño de Galicia. Durante as últimas datas, detectouse a presenza de carabelas portuguesas (Physalia physalis) en diferentes areais galegos. E malia que esta especie non é considerada unha medusa, dado que son colonias de pequenos organismos mariños denominados hidrozoos, as formas de actuar ante a súa picadura son as mesmas que se deben seguir coas augamares.
En primeiro lugar, a persoa que fose alcanzada por unha medusa deberá saír da auga e eliminar os posibles restos de tentáculos que teña no corpo. Así, para realizar esta extracción deberá evitar o contacto directo coas mans, empregando pinza ou luvas, ou na súa ausencia, co bordo dun obxecto ríxido e plano. Nesta primeira actuación, é moi importante que en ningún momento se rasque ou fregue a zona afectada, nin que se empreguen toallas ou area para limpar a ferida, xa que esta presión podería aumentar a liberación de veleno.
O segundo paso a seguir é lavar a zona afectada con auga de mar limpa, comprobando previamente que esa auga non teña fragmentos de tentáculos. Neste caso, é preciso apuntar que endexamais se debe lavar a zona afectada con auga doce, dado que o cambio de salinidade provoca unha maior liberación de veleno. Tampouco se debe utilizar amoníaco, vinagre ou ouriños.
En terceiro lugar, deberase aplicar frío sobre a zona da picadura mediante unha bolsa de plástico con xeo, e por un espazo de tempo de 15 minutos. Deste xeito, evitase que o veleno pase á rega sanguínea.
O cuarto e último será desinfectar a ferida con tintura de iodo para evitar posibles infeccións. Así, coidarase a ferida ata que cicatrice e tentarase evitar outra posible picadura durante o resto do verán, pois as súas consecuencias poden ser moito peores ao quedar o corpo sensibilizado ao veleno.
Cómpre lembrar que no caso de que a praia conte con servizo de socorrismo, deberase acudir ao mesmo e que, no caso de padecer síntomas xerais como náuseas, vómitos, mareos, cambras musculares, dor de cabeza, ou dificultade para respirar, deberase acudir ao centro sanitario máis próximo ou chamar ao 112.
