Berto deixa a música por un trastorno bipolar: “A vida fáiseme máis complexa ca nunca”

"Chegou un punto no que necesitaba parar”, relata o exmembro do grupo Verto

O músico galego Berto facía a través da súa rede social de Instagram un anuncio na tarde do martes. Unha das principais razóns para despedirse do seu proxecto en solitario e como productor de grupos como Fillas de Cassandra é que leva meses de baixa por un trastorno bipolar, “e a vida estase a facer bastante máis complexa ca nunca”. Aínda así, o artista subliña que xa pode poñerlle nome ao que lle leva pasando durante anos. En novembro de 2021 publicou o seu disco Viaxe ao espazo interior, no cal xa tratara dun xeito profundo a depresión severa que padecía naquel momento.

“Perdoa se non teño forzas para escaparme deste furacán”, canción Que sintes?, do disco Viaxe ao espazo interior.

O elefante na habitación

Na actualidade fálase da saúde mental dun xeito moito máis aberto e natural. Porén, non todos os trastornos mentais acadan o mesmo interese na sociedade, xa que outros seguen a estar moi estigmatizados. Mentras que a depresión e a ansiedade son amplamente recoñecibles, outros cadros de patoloxía mental grave permanecen silenciados. Isto converte a diagnose nun reto, e máis a partir de certa idade. 

Publicidade

Alberto Mira –o seu nome non artístico– chegou á súa diagnose tras un período moi longo de trastornos no estado de ánimo ou ciclotimias. A ciclotimia caracterízase por episodios de euforia, optimismo e moita actividade física e mental, todos eles síntomas vencellados á denominada hipomanía. Doutra banda, a fase depresiva da ciclotimia inclúe os sentimentos de soidade, culpa e inutilidade, fatiga e problemas de concentración. Nalgúns casos graves pódese chegar ás ideas suicidas. O exmembro de Verto, autor de temas como Oie gayego, atópase dentro do espectro bipolar, explica, aínda que os seus episodios de hipomanía non chegan á manía, exclusiva dos trastornos de bipolaridade de tipo I e máis grave. “A miña vida estaba moi desordenada e inestable. Tiña picos moi altos de actividade, de crear moitísima música. De repente pasaba a ser incapaz de facer absolutamente nada”, lembra. 

Tiven a sorte de poderme custear un psiquiatra privado, naquel momento precisaba a axuda

A súa primeira opción foi a sanidade pública. Porén, os procesos asociados á saúde mental adoitan ter listas de espera moi dilatadas no tempo. Isto dificulta tanto a diagnose como o tratamento e seguimento do paciente. “Tiven a sorte de poderme custear un psiquiatra privado, o cal está un pouco en contra da miña ideoloxía, pero naquel momento precisaba a axuda”, comenta.

Publicidade

Na actualidade compaxina a psicoterapia coa medicación, o cal explica que “axudou moitísimo” a mellorar a súa calidade de vida. Tamén axuda, di, o feito de ter unha diagnose, xa que poder entender dun xeito máis sa a súa forma de comportarse sen culpabilidade.  Decidiu aparcar o seu proxecto artístico en solitario: “Tiña moi claro que se me quería adicar á música tiña que ser dende a paixón, e ultimamente non me saía”. E retomou a súa formación na medicina. Nestes intres atópase preparando o MIR, e di que agora lembra o que lle enamorou ao estudar a carreira. Ten claro que lle gustaría continuar os seus estudos enfocándose na psiquiatría. “Interésame moitísimo todo aquilo vencellado á neuropsicoloxía e ás relacións entre cerebro e conduta”, explica.

Dende hai uns meses forma parte do colectivo artístico RSK Emocional. Alí comparte a súa paixón con artistas visuais, músicos e outros talentos de distintas disciplinas. “Gústanos ter este lugar no cal dialogar e medrar dun xeito colectivo, xa que a industria musical estase a converter nun traballo moi individualizado”.

O armario da saúde mental

Berto destaca como moi positiva a sensibilización da sociedade de cara aos distintos trastornos mentais e que se fale deles dun xeito directo. Porén, explica: “Moitas veces banalizamos a saúde mental. Úsanse termos como bipolar ou TOC (Trastorno Obsesivo Compulsivo) moi á lixeira. Penso que queda moitísimo traballo a nivel social. Temos que entender estas enfermidades dende a empatía e non como unha etiqueta, xa que non teñen por que ser o que che defina”. O feito de falar dunha conduta como estraña, di, é o verdadeiramente estraño. 

Ao proceso de aceptación de ter unha enfermidade ou trastorno crónico, cunha medicación que o acompañará durante toda a súa vida, súmase o feito de ter que “saír do armario da saúde mental”, tal e como o explica o propio Mira. “Tiven que falar co meu círculo máis próximo, obviamente, pero tamén coas artistas e outras compañeiras coas que estabamos a traballar nalgún proxecto conxunto. Chegou un punto no cal precisaba parar, e houbo quen o entendeu perfectamente e quen non”. Decidiu dar un paso máis e facelo público nas súas redes sociais. Trátase dun posicionamento fronte ao estigma dos trastornos mentais dos cales aínda non se fala. 

A herdanza xenética, clave nos trastornos de bipolaridade

Estímase que ao redor dun 2% e un 4% da poboación mundial atópase dentro do espectro bipolar. No caso de Galicia, este conxunto de trastornos poderían afectar a unhas 72.000 persoas. Aínda se descoñece a súa causa. Porén, a maioría dos estudos científicos amosan que unha gran parte (80%-90%) das persoas teñen antecedentes familiares. No ámbito galego, a Asociación Bipolar de Galicia (ASBIGA) leva traballando dende o ano 2003 para ofrecer axuda a pacientes, familiares e profesionais da saúde mental de cara a unha normalización deste tipo de trastornos.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

As persoas que se preocupan en exceso procesan a información de forma máis lenta

https://theconversation.com/javascripts/lib/content_tracker_hook.js *Artigo de Hai momentos do ano ou na vida nos que...

Amigas, veciñas e coa mesma doenza: o testemuño de dúas pacientes de esclerose múltiple

Raquel Ron e Carmen Ventoso conviven dende hai anos con esta doenza autoinmune, a cal ten unha altísima prevalencia no territorio galego

Confirmado: hai unha estreita relación entre a microbiota e a deterioración da saúde mental

Un estudo realizado en Corea do Sur estimou unha probabilidade 1,4 veces maior de padecer depresión se mediaba unha dieta xenerosa en ultraprocesados

Gastos excesivos, comidas familiares… Estes son os consellos para sobrevivir o Nadal

A psiquiatra galega Iria Veiga recomenda repartir as tarefas do fogar e non sobrecargarse con compromisos sociais