O banco de leite materno de Santiago de Compostela converteuse no primeiro en España en ser certificado pola norma UNE 179003, que avalía a xestión de riscos para a seguridade dos pacientes. A certificación, avaliada pola entidade AENOR, controla e garante que todo o proceso de tratamento do banco de leite humano doado do CHUS se leva a cabo cos máis altos estándares de calidade e seguridade. O banco compostelán é, xunto ao de Vigo, un dos dous existentes en Galicia. Deste xeito, pasa a ser o primeiro acreditado pola norma europea e o terceiro do país en recibir unha certificación de calidade.
As instalacións de doazón de leite materno, que abriron en marzo de 2016, xestionaron xa a doazón de 550 litros de leite materno proporcionado por 110 mulleres. Isto permitiu alimentar con leite materno procedente do banco a 116 acabados de nacer, dos cales, o 70% foron grandes prematuros (menos de 32 semanas de xestación e/ou cun peso inferior a 1.500 gramos), mentres que o 30% restante foron nenos con risco de desenvolver patoloxía intestinal por distintos motivos.
O banco de leite materno de Santiago permitiu alimentar a 116 nenos con riscos de saúde
“Grazas á xenerosidade destas nais, puidemos non só achegar unha nutrición de calidade aos nosos pacientes e que toleren máis prontamente a alimentación enteral, senón ademais diminuír a prevaleza de enfermidades graves como a enterocolite necrosante nun 50%”, subliña Luz Couce, xefa do servizo de Neonatoloxía da xerencia compostelá.
O labor das profesionais que atenden o banco de leite, segundo sinala o Sergas, vai máis aló do procesamento e distribución de leite materno, xa que o “noso principal obxectivo é a promoción da lactación materna e o apoio ás nais lactantes, para o que puxemos en marcha, entre outras medidas, talleres de formación para os profesionais do noso centro e talleres de apoio á lactación para aquelas nais que acaban de ter un fillo recentemente nado ou que precisen apoio”, subliña Luz Couce.
A Organización Mundial da Saúde (OMS) recomenda que o leite humano sexa o alimento de elección durante os seis primeiros meses de vida dun bebé. Ademais, a través de distintos estudos realizados nos últimos anos demostrouse que a lactación materna protexe fronte ás enfermidades infecciosas causadas por virus, bacterias e parásitos ata que o sistema inmune do neonato se desenvolve por completo, e tamén doutras enfermidades a longo prazo, como a diabetes ou Crohn, entre outras.
Por outra banda, demostrouse que é o aporte nutritivo máis completo para un recén nado, é fácil de dixerir e produce menos ganancia de peso innecesaria. Tamén hai estudos que sinalan un efecto positivo da lactación materna na evolución cognitiva do neno. E en canto aos prematuros, está cientificamente probado que alimentalos con leite materna é mellor que facelo con fórmulas derivadas do leite de vaca e asóciase con maior supervivencia. Por todo iso, a OMS indica que cando non se dispoña de leite da propia nai, o leite pasteurizada de nais doantes seleccionadas é a mellor opción para a alimentación dos nenos, sobre todo si se trata de nenos doentes ou de alto risco.
