A Dirección Xeral de Saúde Pública (DXSP) do Sergas informou o pasado venres, a través do boletín quincenal Venres Epidemiolóxico, do aumento de casos de papeiras (doenza tamén coñecida co nome de parotidite), que está tendo lugar nas últimas semanas en Galicia. A incidencia é maior entre mozas e mozos de entre 15 e 24 anos e, aínda que o aumento é xeralizado en todas as zonas de Galicia, tense detectado un crecemento notable nas áreas de Vigo e Santiago.
A situación fixo que os técnicos da DXSP emitiran a pasada semana unha nota para recomendar especialmente á mocidade de entre 18 e 24 anos a revisión da súa cartilla de vacinación. Aínda que a maioría deles teñen administradas as dúas doses da vacina triple vírica (sarampelo, rubeola e parotidite), xa que figura no calendario vacinal galego dende 1981, aconséllase consultar co médico de cabeceira en caso de que haxa dúbidas.
Segundo o Sergas, aínda que o total de casos anuais de momento está por debaixo de anos anteriores como o 2016, o aumento das últimas semanas levou a notificar a situación para evitar unha propagación maior da doenza. As autoridades sanitarias apuntan que, malia que a meirande parte dos afectados recibiron as dúas doses da triple vírica, a efectividade da vacinación descende co paso do tempo. Con todo, sublíñase que, no caso das persoas que teñen as dúas doses, os síntomas son máis leves, a transmisibilidade menor e as complicacións menos frecuentes.
Este novo abrocho cumpre cun certo patrón de periodicidade da doenza, con endemias de moi baixa intensidade cada seis anos (1995/96, 2001/02, 2005/06 e 2012/13).
Os síntomas máis habituais das papeiras son a dor facial, febre, dor de cabeza, dor de garganta e perda de apetito. O máis característico é a notable inchazón das fazulas e a mandíbula que se debe á inflamación das glándulas salivares, que adoita doer ao tacto. s primeiros síntomas aparecen de 16 a 18 días despois de contraer a infección, aínda que este período pode variar entre os 12 e os 25 días.
A maioría das persoas recupéranse nun curto espazo de tempo. Porén, ás veces xorden complicacións, especialmente nos adultos: inflamación nos testículos nos homes que chegaron á puberdade, que moi poucas veces causa problemas de fertilidade; encefalite; meninxite; inflamación nos ovarios ou nas glándulas mamarias nas mulleres que chegaron á puberdade, e xordeira.
Recomendacións para as papeiras
A parotidite é unha enfermidade benigna pero contaxiosa. Pode transmitirse a través da saliva ou das secrecións da boca, nariz ou gorxa, polo que unha persoa infectada pode transmitir o virus ao tusir, esbirrar ou falar; ao compartir obxectos cos demais, como cuncas ou cubertos; e ao tocar obxectos ou superficies coas mans sen lavar e que logo tocan outras persoas. As papeiras pódense transmitir dende dous días antes de que as glándulas salivares comecen a inflamarse ata 5 días despois do comezo da inflamación.
Para previr a extensión das papeiras, Sanidade recomenda que as persoas que a padezan non acudan ao seu centro académico ou traballo, ou a outro tipo de actividade común como pode ser a deportiva, nos cinco días seguintes ao comezo dos síntomas. Ademais, debe evitarse ter contacto con embarazadas, persoas inmunodeprimidas ou nenos menores de 12 meses.
