As defuncións provocadas por tumores aumentaron un 1,4% en Galicia; as derivadas de enfermidades infecciosas un 1,7% igual que as que teñen que ver co sistema nervioso; e as relacionadas co sistema respiratorio un 24,4%. Así o confirman os datos publicados este luns polo Instituto Nacional de Estatística e que se corresponden ao exercicio do 2021 de forma definitiva e ao primeiro semestre de 2022 de xeito provisional. Estes últimos consolidaranse durante o vindeiro ano.
Por outra banda, segundo o INE, Galicia rexistrou a maior caída de defuncións por enfermidades do sistema circulatorio no primeiros seis meses de 2022. E, en xeral, as mortes no país subiron un 4,7% ata o mes de xullo. Pola contra, as defuncións por doenzas do sistema circulatorio diminuíron un 4,5% na comunidade nesta primeira metade do ano.
No resto do Estado
No ano 2021 producíronse en España 450.744 defuncións, 43.032 menos que no ano anterior (un 8,7% menos), e máis da metade foron como consecuencia dunha enfermidade circulatoria ou dun tumor, segundo o informe ‘Estatísticas de defuncións segundo causa de morte. Ano 2021’, publicado polo INE.
Tal e como se desprende no informe, a taxa bruta de mortalidade situouse en 952,3 falecidos por cada 100.000 habitantes e, por sexo, faleceron 231.410 homes (un 7,3% menos que en 2020) e 219.334 mulleres (un 10,2% menos).
O 96,3% das defuncións debéronse a causas naturais, aínda que faleceron 433.913 persoas por estas causas, un 9,2 por cento menos que en 2020. No entanto, e en relación con 2019 (ano previo á pandemia) en 2021 en España producíronse 32.041 defuncións máis (un aumento do 7,7%). Por sexo, o incremento foi do 8,8 por cento no caso dos homes e do 6,5 por cento entre as mulleres.
O grupo de enfermidades do sistema circulatorio mantívose como primeira causa de morte en 2021, co 26,4% do total (e unha taxa de 251,8 falecidos por cada 100.000 habitantes), seguida dos tumores, co 25,2% do total (e unha taxa de 240,1). As enfermidades infecciosas, que inclúen a COVID-19, foron a terceira causa de morte co 10,2% do total (e unha taxa de 97,2).
Pola súa banda, as enfermidades respiratorias situáronse como cuarta causa de morte, co 7,9% do total e unha taxa de 75,1 falecidos por cada 100.000 habitantes. Respecto ao ano anterior, os falecementos debidos a tumores aumentaron un 0,8%.
Pola contra, os debidos a enfermidades infecciosas, a enfermidades do sistema respiratorio e a enfermidades do sistema circulatorio diminuíron un 43,1%, un 16,3&e un 0,6&, respectivamente.
