O grupo de Medicina Xenómica, que dirixe o catedrático Ángel Carracedo desde Santiago de Compostela, coordinará desde Galicia unha das meirandes investigacións que se realizará no mundo para abordar a evolución da Covid-19 nos pacientes desde o punto de vista xenético. Desde o comezo da crise, o científico galego e o seu equipo, así como moitos dos seus habituais socios nas investigacións que desenvolven, comezaron a valorar as posibles vías de estudo para abordar a epidemia desde os determinantes xenéticos de cada individuo. Embarcáronse así na Covid-19 Host Genetics Initiative, unha plataforma mundial na que se poñían en común as propostas desta rama da ciencia. E este xoves anunciouse que a colaboración internacional, da que forman parte máis de 20 hospitais (entre eles varios de Galicia), así como diversos grupos de investigación de alto nivel, recibiu financiamento do Instituto de Salud Carlos III (ISCIII) para poñerse en marcha. Ademais, segundo detalla a USC, contará coa axuda da Fundación Amancio Ortega dentro do seu presuposto para a loita contra a Covid-19.
Un estudo con 8.000 afectados pola doenza
A busca de determinantes xenéticos e biomarcadores xenómicos de risco que podan predispor a sufrir unha infección a causa do virus SARS-CoV-2 máis grave, ou que mesmo podan causar a morte en persoas aparentemente sen factores de risco asociado, é o principal obxectivo da investigación dirixida por Ángel Carracedo, tamén director da Fundación Pública Galega de Medicina Xenómica do Sergas. Tamén coordinará o proxecto o director científico do Centro de Investigación Biomédica en Rede de Enfermidades Raras, Pablo Lapunzina.
O equipo buscará biomarcadores xenéticos en pacientes que teñan recibido tratamento durante a infección e que evolucionaran de xeito dispar
O equipo buscará biomarcadores xenómicos de risco ou protección en pacientes que teñan recibido tratamento durante a infección e que evolucionaran de xeito dispar. Este proxecto abarcará a 8.000 pacientes con infección por SARS-CoV-2 e test microbiolóxico positivo, tanto de España como doutros países do mundo. Concretamente, centrarase en 7.000 pacientes de España e outros 1.000 de países latinoamericanos, cunha maior mestura xenética.
Con estes datos, os investigadores disporán do poder estatístico suficiente para determinar a relación entre os eventos de interese e as variantes xenéticas estudadas. O consorcio desenvolverá un estudo de asociación de xenoma completo (GWAS) na mostra de 7.000 pacientes españois e un estudo de secuenciación de xenoma completo en 300 pacientes seleccionados. O GWAS realizarase no Centro Nacional de Xenotipado na Fundación Pública Galega de Medicina Xenómica (SERGAS), en Santiago de Compostela.
“Os datos clínicos, é dicir, signos, síntomas e achados, así como os antecedentes persoais e epidemiolóxicos recolleranse nunha base de datos común xa deseñada para este proxecto”, explica Carracedo. “Atoparemos así determinantes xenéticos/xenómicos de risco e mala evolución que permitan unha mellor estratificación dos pacientes e a adecuación e optimización de protocolos terapéuticos“, afirma o catedrático da USC.
O proxecto desenvolverase ao longo dun ano e será coordinado dende o Centro de Investigación Biomédica en Rede. Na execución do mesmo, intervirán investigadores de Santiago de Compostela, Vigo, Lugo, Santander, Madrid, Bilbao, Valladolid, A Coruña, Segovia, Granada, Barcelona, León, Soria, Burgos, Sevilla, Lleida e Tenerife, así como de varios países de Latinoamérica e Europa como Arxentina, Uruguai, Brasil, México, Colombia ou Reino Unido.
