A reunión do comité clínico que analiza a evolución da pandemia da Covid-19 en Galicia deparou este martes novos cambios no mapa de restricións que afecta á cidadanía dos concellos do país, segundo informou a Consellería de Sanidade. Con todo, non entrarán en vigor ata a medianoite do venres 12 de marzo. Ata entón rexerán as medidas anunciadas o pasado venres pola Consellería de Sanidade. Pero desde esa data, esta será a situación:
- Nivel máximo: Paradela, A Pobra do Brollón, Boborás, A Mezquita, Vilardevós e Pontecesures. Estes municipios quedarán pechados perimetralmente e non se poderá saír deles agás causa xustificada, tamén pechará a hostalaría e limitaranse as reunións a persoas conviventes, entre outras medidas.
- Nivel alto: Soutomaior, Ponte Caldelas, Vilanova de Arousa, Mos, Cambados, Guitiriz, Lourenzá, Chantada, Mugardos, Cariño, Arteixo, Miño e Sobrado. A mobilidade limítase aos desprazamentos entre estes mesmos concellos, pero non se poderá ir, agás causa debidamente xustificada, ao resto de municipios de Galicia. Permítense as reunións de ata catro persoas non conviventes. A hostalaría está pechada no interior e aberta nun 50% nas terrazas.
- Nivel medio: o resto de concellos de Galicia (294). A mobilidade está permitida entre eles, permítense reunións de ata catro persoas non conviventes e a hostalaría estará aberta ata un 30% no interior e 50% nas terrazas.
Deste xeito, a partir do venres entran na listaxe de concellos afectados polos dous máximos niveis de limitacións Paradela (pasa de alto a máximo), Vilardevós e Pontecesures (de medio a máximo), e Chantada (de medio a alto). Soutomaior pasa de máximo a alto. Mantéñense no nivel de máximas restricións A Pobra do Brollón, Boborás e A Mezquita, e no nivel alto seguirán Ponte Caldelas, Mos, Sobrado, Miño, Arteixo, Cambados, Vilanova de Arousa, Guitiriz, Lourenzá, Cariño e Mugardos. Por outra banda, Ponteceso verá aliviadas as súas limitacións a partir do venres. O resto dos concellos galegos quedan en nivel medio.
Así quedará, por tanto, o mapa de limitacións a partir do venres: