Os mozos galegos de ata 21 anos poderán vacinarse fronte ao virus do papiloma humano a partir do próximo luns 26 de maio. A medida, que foi anunciada este martes polo conselleiro de Sanidade, Antonio Gómez Caamaño, ten como obxectivo inmunizar a 24.500 rapaces varóns. Desde 2024, xa se inoculaba aos de ata 18 anos.
O Goberno galego ofrece, desde 2008 no caso das nenas e desde 2022 en nenos, a vacina fronte ao virus do papiloma humano ao cumpriren os 12 anos. A porcentaxe de adherencia a esta vacina en nenas nadas desde 2006 a 2010 está preto do 100%. No caso dos nenos, a cohorte de 2010 chega a unha cobertura próxima ao 93%.
O titular de Sanidade adiantou o lanzamento dunha campaña de difusión en medios de comunicación. “Conscientes da súa efectividade, en setembro de 2024 (…) ampliamos a vacinación a todos os nenos ata 18 anos”. Unha vacinación que agora, dixo, amplían de novo, elevándoa ata os 21 anos. A intención é que, sumada á información facilitada polos profesionais, sirva para trasladar a conveniencia de vacinarse contra o VPH.
Achegar a vacina aos colexios
A próxima campaña da gripe tamén incluirá outras novidades. Por exemplo, a vacinación desta ampliarase ata os 11 anos. Ademais, poderá facerse por vía intranasal para evitar a picada. Esta nova versión, introducida para os nenos de entre 24 e 59 meses, mellorou as coberturas ata 10 puntos con respecto o ano anterior. Agora, xa as teñen o 65,78% dos cativos.
A Xunta tamén porá en marcha un proxecto piloto para administrar esa vacina nos centros educativos. Este novo proxecto desprazará a equipos de enfermería, co obxectivo de achegar a vacina a 19.200 escolares de educación infantil e primaria correspondentes aos nados entre 2014 e 2022. Segundo Gómez Caamaño, a intención é aumentar así a accesibilidade e facilitar a conciliación familiar.
As novas ampliacións aumentan os posibles beneficiarios en case 150.000 rapaces, acadando os 216.000. Isto suporá un investimento duns 2.350.000 euros, o que representa un incremento de 1,1 millóns de euros respecto á tempada anterior.
A administración galega tamén avanza a decisión de ampliar o rango de idade da vacina reforzada de alta carga contra a gripe. Agora, estará dispoñible desde os 70 ata os 79 anos. Este maior alcance é consecuencia dos ensaios clínicos Galflu realizados para avaliar a efectividade da vacina, na que participaron 134.000 persoas durante dúas tempadas. En total, a poboación inmunizada coa vacina reforzada aumentará en 220.000 persoas, para acadar os 540.000.
Vacinación no gonococo e no dengue
A inmunización fronte ao gonococo en menores de 65 anos de alto risco tamén estará dispoñible en Galicia. Sumarase á vacina contra o dengue, aínda que esta dependerá doutros factores, como o destino da viaxe, as actividades que se realicen ou a duración ou percorrido.
Gómez Caamaño tamén se referiu ao novo estudo de Nirsegal sobre a efectividade da inmunización contra a bronquiolite. Segundo estes datos, nos tres primeiros meses da súa posta en marcha durante o ano 2023 conseguiu evitar máis de 400 ingresos en lactantes de menos de 6 meses.
