Hai un ano, Galicia levaba xa nestas datas tres semanas en plena onda epidémica da gripe, con picos de ingresos hospitalarios durante o Nadal. Pero esta tempada, a pandemia chega con retraso, aínda que as baixas temperaturas están a provocar xa os ascenso de casos confirmados. E esta pode ser a semana clave na que se dispare a curva ascendente, como sucede todos os anos.
Os ingresos hospitalarios seguiron a subir na última semana. O virus que máis circula é o A (H1 N1), o da pandemia da gripe A, ao contrario que o pasado inverno, cando o maioritario foi o B.
Agora mesmo, en España hai xa tres comunidades en fase epidémica: Cantabria, País Vasco e Baleares. No resto, a gripe segue a chegar esta tempada con retraso. O caso non é excesivamente raro, porque na tempada 2015/2016 o pico de casos se rexistrou no mes de febreiro. Ademais, no Servizo Galego de Saúde apuntan a que a chegada tardía da gripe non significa que a súa incidencia final sexa menor. Por exemplo, o ano pasado na primeira semana de marzo aínda houbo en Galicia 25 mortes atribuidas á gripe.
No conxunto do Estado, as estatísticas da gripe están en 47,6 casos por cada cen mil habitantes, xa moi preto dos 55 casos que se establecen como inicio da onda epidémica.
Á espera do comezo da onda de gripe de 2019, os consellos de saúde seguen a ser tapar boca e nariz para toser, lavar as mans con frecuencia, evitar espazos moi concurridos e, sobre todo, non acudir ao posto de traballo en caso de ter os síntomas, especialmente a febre. E tamén é posible aínda solicitar a vacinación, que está aberta ata o vindeiro 25 de xaneiro.
