Aos seus 90 anos, un dos pais dun dos achados científicos máis importantes do século XX vese envolto de novo na polémica. O biólogo estadounidense James Watson, que xunto a Francis Crick, Maurice Wilkins e Rosalind Franklin describiu a estrutura da dobre hélice do ADN, saíu de novo á palestra debido aos seus comentarios racistas, que xa realizara en ocasións anteriores, sostendo que a intelixencia das persoas negras é menor que nas brancas. “Hai unha diferencia na media dos tests de intelixencia; e diría que é xenética”, afirmou Watson nun documental da cadea estadounidense PBS.
No documental, que leva por título Decoding Watson, ofréceselle ao premio Nobel de 1962 a posibilidade de retractarse polas súas declaracións anteriores. Pero o científico reafírmase: “Gustaríame cambiar de opinión porque houbese novos achados científicos que amosasen que o adquirido é moito máis importante ca o innato, pero non os vin”, sostén.
Estas frases acabaron coa paciencia do Cold Spring Harbor Laboratory (CSHL), o centro que Watson dirixiu durante décadas. Nun comunicado, o laboratorio sinalou que “rexeita sen ningún xénero de dudas as inconsistentes e temerarias opinións persoais” de Watson. “Son palabras reprensibles e insostibles por parte da ciencia, e de ningún xeito representan as visións do laboratorio, polo que condenamos o mal uso da ciencia para xustificar estes prexuízos”.
Numerosos científicos e asociacións de todo o mundo manifestaron de novo o seu rexeitamento ante as palabras do biólogo estadounidense.
Racismo e homofobia
As afirmacións de Watson, que se fixeron públicas o pasado 2 de xaneiro, obrigaron ao centro que dirixiu entre 1968 e 1993 a revocarlle as honras de catedrático e profesor emérito e fiduciario de honra. Estes recoñecementos xa foran suspendidos en 2007 cando Watson afirmara tamén que a intelixencia dos africanos era menor ca a do resto dos cidadáns do mundo, aínda que lle foron restablecidos despois dunha carta de desculpa escrita polo propio Watson. Así, o laboratorio só lle manterá o recoñecemento de honra por respecto ás súas contribucións á ciencia.
Noutra ocasións, o biólogo tamén xerou un gran rexeitamento debido a declaracións homófobas: chegou a afirmar que unha muller debería ter dereito a abortar se as análises previas ao parto evidenciaban que o seu fillo ía ser homosexual.
