Un informe sobre a aplicación da metodoloxía SROI (Social Return On Investment) á actividade do Instituto de Investigación Sanitaria Galicia Sur (IIS Galicia Sur) revela que por cada euro que esta entidade inviste, a sociedade obtén un retorno de 10,33 euros. Este dato confirma a evidencia de que o investimento público en actividades relacionadas coa investigación acaba por supoñer un gran beneficio para a sociedade.
Os datos do informe apuntan que as actividades realizadas ao longo do ano 2023 polo IIS Galicia Sur tiveron uns ingresos totais de 5.971.259 euros e xeraron un valor de impacto social que alcanzou os 61.709.370 euros. Para a directora do IIS Galicia Sur, Eva Poveda, estes datos demostran que “quizais sexa máis valioso o valor de promover políticas que fomenten un maior investimento en investigación porque, claramente, ademais da necesidade de seguir xerando coñecemento científico para abordar os principais retos sanitarios, como vimos, é moi rendible”.
Metodoloxía SROI
A metodoloxía SROI foi desenvolvida inicialmente a finais do século pasado polo instituto Robert Enterprise Development Fund (REDF) de California e na actualidade é empregada de xeito habitual en ámbitos de ciencia e investigación e tamén para a análise de proxectos europeos. En Galicia o IIS aplicouna por primeira vez co obxectivo de “obter unha visión máis completa do impacto do noso traballo, medindo e informando do valor social, ambiental e económico xerado”, sinala Poveda.
A análise realizada na actividade do IIS Galicia Sur abrangue diferentes áreas, tanto a dirixida directamente ás persoas (persoal, alumnado das carreiras investigadoras, asociacións de pacientes, centros educativos, etc.) como ás actividades formativas e os servizos que se ofrecen ao persoal investigador, á comunidade científica en xeral, aos profesionais sanitarios das áreas sanitarias de Vigo, Pontevedra e Salnés e ás empresas. Tamén se tivo en conta o impacto dos proxectos de I+D+i, a transferencia de coñecemento e a acción social.
Segundo explica Poveda, a aplicación do modelo SROI “é unha forma de autoavaliarnos máis alá dos indicadores tradicionais, como a produción científica ou financeira. O modelo de retorno social do investimento (ISR) permítenos, en última instancia, obter unha visión máis completa do impacto do noso traballo medindo e informando do valor social, ambiental e económico xerado”.
O coñecemento científico é útil e rendible
O resultado obtido supón para o IIS Galicia Sur unha confirmación do valor do seu traballo, segundo indica Poveda, e ademais motiva a todo o seu equipo a seguir traballando na mesma liña. Ao seu xuízo, máis alá da confirmación dos resultados do informe, os cidadáns xa están a valorar positivamente o traballo das entidades de investigación sanitaria coma o IIS, pero sempre é bo confirmar que a xeración de coñecemento científico tamén é rendible, ademais de contribuír a abordar os grandes retos en saúde.
Cara ao futuro, a intención dende o IIS Galicia Sur e continuar coa autoavaliación a través da metodoloxía SROI, polo menos cada dous anos, para así poder comprobar cales son as actividades que teñen maior impacto e ver tamén as áreas onde poden existir posibilidades de mellora. “Seguiremos a traballar internamente para optimizar a forma na que obtemos os indicadores para que o cálculo sexa o máis real posible e non se subestime ningún aspecto”, conclúe Poveda.
A directora do IIS Galicia apunta tamén que sería moi positivo que esta metodoloxía se poida estender a outros institutos de investigación galegos e destaca que o modelo SROI, aínda non é moi empregado en centros de investigación españois, pero si que ten un impacto importante no ámbito europeo.
