Non todos os días un dos museos máis visitados do mundo cambia a súa información por unha investigación galega. O historiador Francisco Prado-Vilar vén de comprobar como o Louvre actualizou o rótulo que acompaña a unha escultura románica dun felino despois de ler o seu traballo. “Sen probas finais pero tampouco sen dúbidas”, a institución parisiense subscribe o estudo que explica a procedencia da peza histórica de San Isidoro de León.
Esta curiosa historia remóntase a hai ano e medio. Segundo relata o distinguido investigador da Universidade de Santiago (USC), foi convidado como profesor visitante na École des Hautes Études e, na súa visita ao museo parisiense, unha pequena escultura localizada entre varias salas chamoulle a atención. “Semellábame familiar, pero non sabáa que estaba no Louvre e vendo o rótulo, non poñía nada máis que podía pertencer a España, á contorna de León”, detalla Prado-Vilar. Foi nese momento cando decidiu comezar a súa indagación.
Tras solicitar documentación da escultura ao propio museo atopouse con que só tiñan un informe de compra. Este indicaba de que a escultura foi adquirida ao anticuario parisiense Brimo de Laroussilhe en febreiro de 1936. “Teño traballado bastante a arte dese período, sobre todo na basílica de San Isidoro de León, e tentei atopar a que portada pertencía este felino a través de diversos arquivos fotográficos que xa manexaba de estudos anteriores”, relata.
Portada norte
Na súa primeira hipótese, Prado-Vilar barallou que a escultura podería proceder da portada sur da basílica. “Pero a través de diversas fotografías da época comprobei que os leóns desa zona foron destruídos, o que me levou a reforzar a idea de que podía proceder da fachada norte do transepto e que era similar aos da sur“. Segundo traslada o investigador, o felino exposto no Louvre puido salvase do destino dos seus “irmáns” debido a que esta portada foi tapiada por varias construcións. Ademais, no século XX o restaurador responsable do arranxo desta parte da basílica levouno do seu enclave orixinal. “E por certas circunstancias que non están moi claras acabou no mercado en París”, sinala.
Así, tras a publicación do seu artigo no portal Románico Digital, o investigador galego mandoulle o seu estudo ao director do ‘”‘Departamento de Escultura anterior a 1.500 do Louvre’ que “quedou encantado”, segundo palabras de Prado-Vilar. “O máis sorprendente é cambiaron a información na súa páxina web moi pouco tempo despois e, xa a semana pasada, puiden comprobar en primeira persoa que mudaron o letreiro que acompaña a escultura. Ademais sorprende que matizan a información cun “sans doute”, que se pode traducir como un sen probas finais pero sen dúbidas”, conclúe.
So cool, they updated the label of 🦁mon petit lion 💙 #Louvre
— Francisco Prado (@fpradovlr) February 3, 2025
When I establish a provenance is always “sans doute”😉 https://t.co/3hfAs525Iv pic.twitter.com/JFZePbB9zR
Referencia: Un león románico en París: En busca de los fragmentos perdidos de la basílica de San Isidoro (Publicado en Románico Digital)
Roubada.