Quevedo e o conde-duque de Olivares non se levaban ben. Polo menos, esa é unha das conclusións ás que se pode chegar tras ler o texto analizado polo catedrático de Literatura Española da Universidade de Santiago de Compostela (USC), Antonio Azaustre Galiana, e o profesor da Universidade de Huelva, José Manuel Rico García. Desconsuelos de los dichosos para que reconozcan los peligros de serlo y sepan prevenirlos é o nome do libro, de acceso público, que inclúe un escrito inédito de Francisco de Quevedo.
Redactada polo escritor do Século de Ouro desde o seu retiro en Villanueva de los Infantes o 20 de agosto de 1633, a obra está dedicada a don Fadrique de Toledo, un destacado militar que sufría a inimizade do conde-duque de Olivares. A copia manuscrita desta obra atópase na sede parisiense dos Arquivos Nacionais de Francia, onde se custodia tras ter sido levada ao Ministerio de Asuntos Exteriores a mediados do século XVIII.
A obra estrutúrase como un diálogo entre o Sentido e a Razón e nela advirte dos perigos da soberbia e a caída inevitable dos poderosos que ignoran a omnipotencia de Deus. “Desconsuelos de los dichosos ten unha gran transcendencia política, e confirma o enfrontamento aberto entre Quevedo e Olivares“, explican Azaustre e Rico.
A segunda obra inédita achada no século XXI
A edición do volume, publicada na Biblioteca Áurea Hispánica de Vervuert, ábrese cun estudo introdutorio no que se describe o manuscrito. Ademais os investigadores confirmaron a autoría de Quevedo e puideron analizar os contidos e as múltiples concordancias con outros escritos seus, así como a estrutura, a argumentación e o estilo. A edición do texto vai acompañada dun completo aparato de notas que aclaran as posibles dificultades de lectura.
A USC estivo presente na recuperación das tres últimas obras inéditas de Quevedo. A primeira das tres foi en 1993, cando Fernando Cabo e Santiago Fernández editaron Execración contra los judíos. O texto era un memorial onde Quevedo se enfrontaba a Olivares por negociar préstamos cos xudeus portugueses. En 2020, Azaustre e Rico publicaron outro memorial inédito de Quevedo. Neste, o escritor dirixíase á Inquisición en relación co conflito que suscitaron as reliquias atopadas no Sacromonte de Granada.
