A cuarta campaña arqueolóxica que se está a realizar no castro de Penas do Castelo, no concello lucense da Pobra do Brollón, está sacando á luz novos datos sobre a historia deste xacemento. Ata o de agora, pouco se sabía sobre este enclave, máis alá da súa complexidade, da súa tipoloxía pouco común e da súa muralla monumental. Os últimos traballos no xacemento, datado no século IX antes da nosa era, revelaron unha gran cantidade de fragmentos cerámicos en “moi bo estado de conservación”. Tamén se atoparon evidencias dun antigo incendio, que puido arrasar algunhas das edificacións do castro.
“Debeu haber un lume que fixo colapsar as paredes de pallabarro, tal e como indica a cor calcinada e os numerosos carbóns atopados. Esta parede cae sobre o que había no interior da edificación, deixándoa selada e nun bo estado de conservación”, explica o equipo de arqueólogos que está a traballar en Penas do Castelo. Con todo, recoñece que aínda se precisa máis información para confirmar estes resultados preliminares.
Este achado puido concretarse grazas aos traballos previos na muralla, que se realizaron na campaña de 2021. As datacións por radiocarbono que se fixeron durante eses traballos dataron o xacemento no século IX antes da nosa era, a época na que se empezaron a construír os primeiros castros. Con este punto de partida, na campaña actual ampliouse unha pequena sondaxe previa no interior do xacemento onde xa se detectara un nivel de derrubo de pallabarro. Agora, ese nivel non só ten unha extensión notable, senón que as evidencias arqueolóxicas suxiren que foi arrasado por un incendio.
Estudo da cerámica do xacemento
Ao comezar a retirar ese nivel é cando aparecen fragmentos cerámicos nun “moi bo estado de conservación”. Trátase de, cando menos, dous cacharros cerámicos practicamente completos e outra gran cantidade de fragmentos por determinar. Ademais, nun dos recipientes aparecen grans de cereal e restos concrecionados nas paredes interiores do mesmo. Os restos de sementes, así como os numerosos carbóns, serán estudados e analizados en laboratorio, co obxectivo de aclarar as datacións de uso deste xacemento. Os fragmentos cerámicos serán tratados pola restauradora Alba Losada, quen intentará reconstruír as pezas e a partir de aí, poder coñecer a súa tipoloxía e cronoloxía.
Ao longo deste semana continuarán os traballos retirando o nivel de pallabarro. Dende o equipo cren que é posible que se produzan novos achados.
