Os dous torques de ouro achados en Betanzos datan da Idade do Ferro

En tan só cinco meses atopáronse dous torques de ouro nunha mesma finca do concello de Betanzos. De feito, a primeira peza descubriuse en maio. Co obxectivo de esclarecer a orixe e datación destas xoias atopadas de xeito casual, un equipo do CSIC está a traballar no Museo Arqueolóxico e Histórico de San Antón, na Coruña, onde están depositadas as dúas pezas. Os resultados preliminares apuntan ao bo estado de conservación dos dous torques e a que poderían datar da Idade do Ferro.

A investigación preliminar fixérona Xosé Lois Armada e Carlos Otero, do Instituto de Ciencias do Patrimonio do CSIC, mediante análise da composición química, estudo analítico da composición do metal e observación microscópica. A caracterización preliminar constata que ambos exemplares presentan os trazos habituais do tipo ártabro, unha tipoloxía da que só se coñecen 24 exemplos, se ben nalgúns casos a adscrición é dubidosa ao conservarse só de xeito fragmentado. Este tipo caracterízase por posuír remates en periña e decoración de fíos enrolados nos terzos laterais, con motivos en espiral con botón central que delimitan a zona lisa. Ademais, un aspecto a destacar desta tipoloxía é que a miúdo non son de ouro macizo, senón que conteñen núcleos elaborados con metais ou aliaxes menos nobres.

Publicidade

Características singulares

En concreto, a primeira peza localizada ten unhas dimensións de 147×143 mm, 11 milímetros de diámetro no aro central e un peso de 390,3 gramos. Como cualidade singular deste torques, cómpre indicar que a unión co aro cos remates amosa unha pericia técnica inferior á do resto da peza o que suxire que se trata dunha reparación antiga. Ademais, os primeiros resultados suxiren o uso dun ouro cunha porcentaxe moi elevada de pureza.

En canto á segunda peza, as dimensión son de 161×38 mm, 18 de diámetro e un peso de 365 gramos. As súas características tamén son os habituais do tipo ártabro, pero cuns terminais lixeiramente distintos entre si, presentando un deles unha forma de tendencia máis amendoada. A diferenza do primeiro exemplar, nesta ocasión os investigadores puideron detectar a presenza dun metal menos nobre no interior do aro a través das lixeiras roturas e zonas de abrasión.

Os resultados da investigación presentáronse esta tarde no Museo Arqueolóxico e Histórico de San Antón, na Coruña. Segundo detallou o conselleiro de Cultura, Román Rodríguez, en rolda de prensa, as pezas foron entregadas á Administración autonómica por un particular e depositadas no museo coruñés para o seu estudo e avaliación. Despois disto, a Xunta levou a cabo unha prospección arqueolóxica e xeofísica na parcela co fin de comprobar se se agochaban outras pezas, pero non foron detectados nin niveis arqueolóxicos nin tampouco materiais antigos.