Venres 29 Marzo 2024

Arrinca a primeira exhumación de represaliados en Galicia ao abeiro da nova Lei de Memoria

Ademais desta intervención na Capela está previsto que este mércores 23 de novembro comecen as exhumacións en Celanova e Lousame

A exhumación no cemiterio veciñal da Capela (A Coruña) este martes 22, dunha fosa cos corpos de Joaquín Antón Rodeiro, Manuel Franco Bermúdez e Francisco Guerreiro Guerreiro, naturais de As Pontes de García Rodríguez, é a primeira das accións que USC e o goberno autonómico executan ao abeiro do Plan de Memoria Democrática de Galicia para o ano 2022, recentemente asinado, no marco do Plan Cuadrienal 2021/2024. Localización, exhumación e identificación de vítimas; divulgación de traballos efectuados e resultados conseguidos; así como o recoñecemento e sinalización dos lugares de enterramento e promoción dos lugares de memoria conforman os tres eixos sobre os que pivota o devandito plan.

Ademais da intervención na Capela está previsto que este mércores 23 de novembro comecen as exhumacións en Celanova e Lousame. A de Celanova é unha fosa común con sete persoas, naturais de Asturias, xulgadas en Camposancos e executadas en Celanova. Foron enterradas nunha fosa común no cemiterio parroquial. Trátase de Baldomero Vigil Escalera Vallejo, Marcelino Fernández García, Guillermo de Diego Álvarez, Alfonso Moreno Gayol, Abelardo Suárez del Busto, Belarmino Álvarez García, e Mariano Blanco González. Pola súa parte, a fosa de Vilacova (Lousame, A Coruña) presenta dous corpos, un deles identificado como Manuel García Hermo, natural de A Pobra do Caramiñal e veciño de Ribeira.

Publicidade

Nas diferentes tarefas a realizar colaboran o grupo HISTAGRA, coordinado polo catedrático de Historia Contemporánea da USC, Lourenzo Fernández Prieto; o grupo SÍNCRISIS, do que forma parte, como coordinador do equipo de arqueólogos, o profesor José Carlos Sánchez Pardo; o antropólogo forense, Fernando Serrulla, do IMELGA; e o equipo do xenetista Ángel Carracedo, que se ocupará do cotexo xenético con aqueles familiares dos asasinados que desexen que se leve a cabo. Os traballos arqueolóxicos están levados a cabo por Tempos Arqueólogos. As tarefas de exhumación que se detallan son as autorizadas polo Ministerio de Presidencia, Relacións coas Cortes e Memoria Democrática. O custo total das actuacións que se levarán a cabo en 2022 dentro destas liñas estratéxicas pola Comunidade Galega ascende a 110.351 euros.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Anunciación Casado, a ‘Pasionaria de Viana’: comezan os traballos de exhumación

As accións enmárcanse no Plan Cuadrienal de Memoria Democrática en Galicia 2023 liderado por un equipo interdisciplinario da USC

Un novo relato da Guerra Civil en Galicia: “Nada facía pensar que o golpe triunfaría aquí”

Científicos das tres universidades galegas propoñen un novo relato da guerra e da ditadura baseado na memoria soterrada dos vencidos

As catro veces que o fenómeno se puido ver en Galicia nos últimos cen anos

A primeira do século aconteceu o pasado domingo, pero os ceos cubertos polo paso dunha borrasca atlántica impediron a súa visualización

Descobren con éxito restos óseos na tumba dun potencial familiar de Colón

A Asociación Colón Galego atopa con éxito os restos de Xohán Mariño de Soutomaior na tumba ubicada na igrexa de San Martiño de Sobrán