A empresa viguesa Amura puxo en marcha o primeiro Centro de Investigación e Desenvolvemento do sector náutico en España, de iniciativa privada, situando a Vigo como un referente da industria náutica a nivel internacional. Un dos principais proxectos nos que traballa o centro de investigación de Amura é o proxecto Biostruct, financiado polo programa Horizonte Europa cunha dotación de oito millóns de euros. Biostruct arrincou este 2024 e proponse desenvolver tecnoloxías avanzadas para a fabricación de pezas en composites a partir de biomateriais.
O seu obxectivo principal é resolver os desafíos técnicos asociados ao actual uso de biocomposites en aplicacións estruturais, un avance que promete revolucionar a construción industrial de embarcacións xa que permitirá que “calquera enxeñeiro do mundo, coa axuda dun software, poida facer os seus cálculos estruturais para a construción industrial de embarcacións con materiais sostibles“, explica o director de Operacións de Amura, Enrique J. Rodríguez.
Para obter os datos necesarios para a fabricación de estruturas con biomateriais, o proxecto Biostruct desenvolverá unha pa de rotor para plantas de enerxía eólica e un barco completamente fabricado en Vigo por Amura, utilizando fibras naturais e bioresinas. Este prototipo, de seis metros de eslora e construído integramente en liño, estará equipado con sensores para recompilar información sobre o comportamento da estrutura en condicións reais de navegación na ría de Vigo, que logo serán utilizados para validar os resultados de simulación.
Ata a data, a simulación do comportamento destas estruturas foi un obstáculo debido aos numerosos problemas técnicos e a falta de datos para garantir a súa viabilidade.
O proxecto Biostruct fomentará o uso de biocomposites en aplicacións estruturais de forma que se reduciría notablemente o emprego de fibra de carbono e de vidro, materiais dos que Europa teñen unha gran dependencia xa que o 80 por cento procede de terceiros países e a metade do 20 por cento restante constrúese baixo licenzas estranxeiras.
Segundo Enrique J. Rodríguez, “a participación dunha empresa viguesa nun proxecto desta magnitude subliña a importancia e necesidade de liderar a construción de embarcacións con biocompostos, unha meta aliñada cos obxectivos da Axenda 2030“.
10 organizacións europeas
O consorcio BioStruct, composto por dez organizacións europeas, foi lanzado nun evento inaugural celebrado na cidade austríaca de Steyr. Esta asociación público-privada europea está integrada por: Profactor (Austria), Abele Ingenieure (Alemaña), Amura (España), Bladeworks (Italia), cidetec (España), Enginsoft (Italia), Ideko (España), Lumosbribe (Chipre), NOMA Resins (Polonia) e Techtera (Francia).
Co crecemento proxectado do mercado de biocompostos, o consorcio prevé un mercado potencial de arredor de 100 millóns de euros para 2030, o que contribuirá significativamente a unha redución estimada das emisións de gases de efecto invernadoiro de entre 2,5 a 4,3 millóns de toneladas de CO2 por ano.
BioStruct, cofinanciado pola Unión Europea a través do programa Horizonte Europa, ten prevista a súa finalización para decembro de 2026. Este ambicioso proxecto non só impulsa a innovación na industria náutica, senón que tamén demostra o compromiso de Europa coa sustentabilidade ambiental e o desenvolvemento tecnolóxico de vangarda.
