Rusia incumpre piares básicos de seguridade nuclear en Ucraína

O Organismo Internacional de Enerxía Atómica asegura que o persoal debe traballar sen presións e con sistemas de comunicación fiables, pero non se está a cumprir

As seis unidades da central nuclear de Zaporiyia, en Ucraína. Crédito: Ralf1969
As seis unidades da central nuclear de Zaporiyia, en Ucraína. Crédito: Ralf1969

A central nuclear máis grande de Europa está en Ucraína. Situada en Zaporiyia, foi ocupada polas forzas rusas hai uns días. Segundo informa a Agencia SINC, Ucraína informou ao Organismo Internacional de Enerxía Atómica (OIEA) de que, aínda que o persoal segue operando na central nuclear, os seus directivos están agora baixo as ordes do comandante ruso. Así mesmo, sinalan que toda acción do persoal —incluídas as medidas relacionadas coa operación técnica das seis unidades de reactor— require da aprobación previa do mando ruso.

Así o comunicou o director xeral da OIEA, Rafael Mariano Grossi, asegurando que contravén un dos piares indispensables da seguridade nuclear. Máis polo miúdo, o terceiro: “O persoal de operación ten que poder desenvolver as súas funcións en materia de seguridade tecnolóxica e física e ter a capacidade de tomar decisións sen presións indebidas”. Amais disto, Ucraína asegura que as forzas rusas que están na central desconectaron algunhas redes móbiles e de internet, de maneira que non se pode obter “información fiable” polas canles normais de comunicación. Isto confirmouno o regulador nuclear ucraíno, que informou ao OIEA das dificultades de comunicación co persoal da central nuclear de Zaporiyia.

Ao parecer, algunhas redes móbiles e de internet están desconectadas

Menos de 24 horas despois de afirmar que puidera manter as comunicacións coa maior central nuclear do país, a autoridade reguladora de Ucraína recoñeceu que as liñas telefónicas, así como o correo electrónico e o fax, deixaron de funcionar. A comunicación por teléfono móbil seguía sendo posible, pero con mala calidade.

Necesidade de comunicacións fiables

Isto contravén outro dos sete piares indispensables de seguridade nuclear, o sétimo: “Debe haber unha comunicación fiable co regulador e outras entidades”. “Estou extremadamente preocupado por estes acontecementos. Apenas uns poucos días despois de que presentase á Xunta do OIEA os sete elementos principais da seguridade nuclear tecnolóxica e física, varios deles xa ven comprometidos”, advertiu Grossi en declaracións recollidas pola Agencia SINC.

“Para poder operar a central de forma tecnolóxica e fisicamente segura, o persoal directivo e o de persoal deben poder desempeñar as súas funcións vitais en condicións estables, sen interferencias nin presións externas indebidas”, subliñou. “E a deterioración da situación en canto ás comunicacións vitais entre o regulador e a central nuclear de Zaporiyia, tamén é unha fonte de profunda preocupación, especialmente durante un conflito armado que pode poñer en perigo as instalacións nucleares do país en calquera momento. As comunicacións fiables entre o regulador e o operador son unha parte fundamental toda da seguridade nuclear tecnolóxica e física”.

“Para poder operar a central de forma segura, o persoal non debe ter interferencias nin presións externas”

Malia os problemas de comunicación, o regulador puido facilitar información actualizada sobre o estado operacional da central nuclear de Zaporiyia e confirmar que os niveis de radiación na central seguían sendo normais. Dos seis reactores, a unidade 1 está en mantemento programado ata mediados de 2022, a 2 funciona agora a plena capacidade, a 3 está en estado de parada fría, a 4 funciona case a plena capacidade, a 5 está a arrefriarse para pasar a un estado de reserva fría, e a 6 está en parada fría. Segundo o regulador ucraíno, actualmente oito dos 15 reactores de Ucraína están en operación, incluídos os dous de Zaporiyia.

Os responsables destacan o feito positivo de que os equipos de operación desta central estean a traballar agora en tres quendas rotativas. Con todo, hai problemas coa dispoñibilidade e a subministración de alimentos, medicamentos e pezas de reposto, o que está a ter un impacto negativo na moral do persoal, segundo o regulador.

Situación en Chernóbil

Os seus responsables tamén informaron que tiñan problemas para comunicarse co persoal da central nuclear de Chernóbil, e que polo momento só era posible mediante correos electrónicos. As forzas rusas tamén tomaron o control deste emprazamento, no que se produciu o accidente nuclear de 1986, un dos maiores da historia. Actualmente o seu persoal, que se compón de máis de 200 técnicos e gardas, aínda non puido traballar de forma rotativa desde o 23 de febreiro.

Tamén trasladan problemas de comunicación co persoal da central nuclear de Chernóbil

Grossi, subliñou en repetidas ocasións a importancia de que o persoal de operación poida descansar para levar a cabo o seu importante labor de forma tecnolóxica e fisicamente segura: “Fago un chamamento a quen ten o control efectivo da central nuclear de Chernóbil para que permitan inmediatamente ao persoal alí presente traballar de forma rotativa en aras da seguridade”.

Máis feitos preocupantes

Outro feito que preocupa ás autoridades é que tamén se perdeu a comunicación con todas as empresas e institucións da cidade portuaria de Mariupol que utilizan fontes de radiación, e non hai información sobre o seu estado, segundo o regulador. Este material radioactivo pode causar graves danos ás persoas se non se mantén en condicións de seguridade e se xestiona adecuadamente.

“Debemos actuar para axudar a evitar un accidente nuclear en Ucraína que podería ter consecuencias severas para a saúde pública e o medio ambiente: non podemos permitirnos o luxo de esperar”, subliñou Grossi.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.