Únete á nosa canle de Whatsapp
Hai uns días unha veciña de Laxe difundiu un vídeo dun home recollendo vidros da Praia dos Cristais. O alcalde da localidade, José Luís Pérez, explicou que é habitual que as persoas que a visitan recollan mostras, mais non dunha maneira tan “descarada”. Na praia, unha zona que atrae a moitos turistas, varios carteis avisaban da prohibición de levar os cristais, mais foron arrincados. Cando a Policía Local se achegou ao lugar xa non había ninguén.
Non é unha zona protexida, co cal, non se poden multar ás persoas que recollan estas pequenas “pedras” rechamantes. Os veciños da zona chaman á responsabilidade xa que é un elemento característico do municipio que compón unha fermosa paisaxe cos raios de Sol. A solución que atopa o alcalde é aumentar a vixilancia, máis aínda nesta época cando por mor do bo tempo se achegan máis visitantes. “Pouco máis podemos facer”, conta Pérez.
A Praia dos Cristais formouse porque antigamente existía un vertedoiro moi próximo. A acción humana e o mal uso dos recursos adoitan ser a orixe deste tipo de praias. Naquel momento, todos os cristais foron a parar ao mar e a auga devolveunos á costa en forma de pequenas pedras de colores. Debido á forza do océano, os cristais fóronse erosionando e regresaron á terra cunha imaxe totalmente distinta, creando un curioso espazo que atrae a todo tipo de miradas.
Precisamente por isto non será posible reencher a praia cando se baleire. “Non se pode repor, cando se acaben, acabaranse para sempre”, conta o alcalde. Por iso, apela á colaboración cidadá e á responsabilidade. Descoñece o motivo polo que aquel home puido levarse tantos cristais, cre que pode ser para encher botellas pequenas para vender ou para decoración. Tamén coa acción humana, a Praia dos Cristais vaise baleirando.
