Dous días despois de establecer novas medidas en concellos como Pontevedra e Ponteceso por mor da incidencia da Covid-19, a Consellería de Sanidade, decidiu este venres estender aos concellos de Laxe, Lalín, A Guarda, O Rosal, Vilaboa e Poio as limitacións de capacidade nos locais de hostalaría e comerciais ao 50%, así como dun máximo de 10 persoas nas reunións públicas e privadas e a redución da capacidade máxima en celebracións, velorios e lugares de culto. As medidas establécense despois da reunión do comité clínico, ao constatar o aumento da transmisión nestas zonas.
A intención da Consellería, explica Sanidade nunha nota de prensa, “é poder actuar de xeito más selectivo e con maior rapidez ante a aparición de casos nunha zona concreta”, polo cal “fronte ás medidas adoptadas para toda a comunidade autónoma dende o principio da pandemia, procura agora acoutar ao máximo a expansión do virus, restrinxindo e regulando determinadas actividades xa non por áreas sanitarias, senón por concellos, cidades ou mesmo barrios”.
Na actualidade, alén dos concellos mencionados nas liñas anteriores, mantéñense limitacións en Carballo, A Laracha, Ponteceso, Arteixo, parte da Coruña, Santiago de Compostela, Lugo, Ourense e Pontevedra. Neste caso, o vindeiro mércores revisarase a situación para ampliar ou reducir ditas medidas.
As actuacións concretas que se tomarán nos novos concellos afectados vanse publicar no Diario Oficial de Galicia ao longo da tarde do venres e entrarán en vigor a partir da medianoite e serán revisadas no prazo máximo dunha semana en función de como evolucione a situación epidemiolóxica. No caso de celebracións como vodas, bautizos e comuñóns, non poderán superar o 50 % do total do salón de banquetes nin o número máximo de 50 persoas para lugares pechados e de 100 persoas no caso de celebrarse en espazos ao aire libre, se ben este apartado da norma non entrará en vigor até o vindeiro luns, polo que non afectará aos eventos previstos para esta fin de semana.
Así queda o mapa de restricións en Galicia:
No caso da Coruña, só unha parte do municipio se mantén con restricións. Son os barrios da Agra do Orzán, Ventorrillo, Sagrada Familia, Vioño, Sardiñeira, Os Mallos e Estación, cunhas rúas delimitadas na orde do DOG, nunha área que se corresponde, aproximadamente, co mapa baixo estas liñas.
A situación actual da Covid-19 en Galicia
Este mediodía, a Consellería de Sanidade difundiu a actualización diaria da pandemia. Respecto ao xoves sumáronse 243 casos á serie tras a realización de 4.732 probas PCR máis. Por outra banda, engadíronse 236 curacións e faleceron catro persoas nas últimas horas, unha delas usuaria dunha residencia de maiores. Desde o comezo da crise no mes de marzo, a Consellería de Sanidade reflicte 19.707 casos de Covid-19.
En canto aos casos activos, a cifra mantense semellante á do xoves, con 4.361 persoas baixo seguimento das autoridades sanitarias. Este indicador estabilízase debido ás altas concedidas nalgúns dos principais brotes das últimas semanas, como os da Coruña e Lugo, e ao aumento de positivos vinculados a novos brotes. aAsí é a evolución por áreas sanitarias:
Nos hospitais hai 26 persoas na UCI e 201 noutras unidades de hospitalización, o que sitúa a ocupación en niveis semellantes á segunda semana de maio, cando comezou a chamada “desescalada”.
No referente aos falecementos, a cifra de óbitos desde o 8 de agosto ascende a 57, das que 25 se corresponden con usuarios de residencias de maiores. Desde marzo faleceron 676 persoas en Galicia con coronavirus.