A capsaicina é un composto extraído do froito das plantas do xénero Capsicum —como os chiles e os pementos picantes—, o que a converte no ingrediente activo perfecto para o que se coñece como gas pementa. Trátase dunha formulación química e foco de actualidade tras o incidente ocorrido no Congreso dos Deputados o mércores 23 de setembro: Ana Vázquez, deputada polo Partido Popular, exhibiu un bote deste spray tóxico no hemiciclo para denunciar a situación en Ceuta despois de pedirlle a un asesor que lavara o recipiente no baño. Tras levar a cabo este proceso, puidéronse ter derramado restos da substancia e producido efectos colaterais.
A Policía decidiu precintar varias dependencias do Congreso, incluíndo unha das cafetarías. Unha das persoas afectadas foi unha muller que tivo que ser atendida polos vómitos provocados a causa do forte olor a gas e, segundo a presidencia da Cámara, máis de dez persoas foron intoxicadas. A pesar de ser coñecido como un produto de defensa persoal, cales son os efectos que pode producir no corpo humano ao entrar en contacto con este composto?
Os efectos
A aplicación directa de gas pementa produce un peche inmediato dos ollos, dificultade de respiración, proído de nariz e tose —un dos síntomas que tiñan os afectados no Congreso dos Deputados—. A duración dos efectos depende da forza do aerosol —a capsaicina está diluída nun 90% de solvente, que pode ser auga ou tricloretano— pero, como normal xeral, adoita durar de 30 a 45 minutos e os efectos diminuídos duran horas. Concretamente, para as personas asmáticas, que están a tomar medicamentos ou son obxecto de técnicas restritivas que reducen a capacidade de respirar, hai risco de morte.
Que di a lexislación?
Existe unha lexislación vixente en España que regula o uso de gas pementa, mediante o Regulamento de Armas (Real Decreto 137/1993) —polo que, a ollos da lei, é un arma, pero non letal— e a Orde Ministerial do 3 de outubro de 1994. De feito, a súa compra é libre para maiores de idade, sempre mostrando o DNI, en armerías e comercios especializados.
