Únete á nosa canle de Whatsapp
O debate sobre os efectos secundarios das vacinas contra a covid nunca desapareceu do espazo público. Agora, un informe do Centro de Farmacovixilancia de Galicia —dependente do Sergas— revela que o 75% dos casos adversos rexistrados producíronse en mulleres, un 23,7% en homes e o 1,3% restante en persoas das que se descoñece o sexo. De todas formas, só se notificaron un total de 2.006 eventos adversos das 6.700.344 doses que se administraron dende o inicio da campaña de vacinación. É dicir, tan só un 0,03% das inxeccións tivo un efecto negativo sobre a saúde das persoas vacinadas.
Dende o Sergas explican que este tipo de acontecementos son “o resultado adverso que ocorre durante ou tras a administración dun fármaco, pero que pode ou non ser atribuído a este”. Do total de casos rexistrados (2.006), preto do 27% foron considerados de carácter grave. Entre as doenzas máis notificadas están a embolia pulmonar (40), a síncope (23) e a parálise facial (16). No que respecta ao perfil das persoas afectadas, o Sergas confirma que o grupo de idade de 30 a 49 anos foi o que máis rexistros presenta, aglutinando o 44,6% do total.
En relación á poboación infantil, o informe recolle 10 notificacións de efectos adversos en menores de entre 2 e 11 anos. Delas, o 60% foron rapazas e o 40% rapaces. No caso deles, as doenzas máis frecuentes foron a vasculite e os tics, que xa estaban en recuperación no momento en que foron notificadas. No que respecta ás nenas, víronse afectadas por miopericardite, síncope e parálise de Bell. Amais disto, rexistráronse dous casos nos que houbo exposición fetal durante o embarazo. Un dos neonatos sufriu un efecto considerado “grave” ao ter un infarto de arteria cerebral esquerda no seu primeiro día de vida. Segundo o Sergas, a nai fora vacinada catro días antes.
Os casos mortais ascenden a 20
No que respecta á mortalidade, o boletín recolle un total de 20 falecemos relacionados cos efectos adversos producidos pola vacinación covid. En porcentaxe, corresponderíanse tan só co 1% do total de casos notificados. No que respecta ás doenzas máis frecuentes, están o infarto de miocardio e a síndrome coronaria aguda (4), a embolia pulmonar (3) e a hemorraxia cerebral (2). En relación ao perfil dos afectados, 10 foron mulleres, 8 homes e os dous restantes son persoas das que se descoñece o sexo.
Por grupos de idade, a maioría dos falecementos produciuse en maiores de 60 anos. Máis polo miúdo, nas franxas de 20-29 e 30-39 notificáronse dous casos en cada unha. Outros dous na de 40-49, e tres deles na de 50-59. O número ascende a catro no grupo de 60-69. Cinco máis para a franxa de 70-79, na que máis falecidos se rexistraron. Finalmente, nos maiores de 80 producíronse tres mortes asociadas aos efectos adversos da vacina.
O ciclo menstrual
Outro dos aspectos que aborda o informe é a relación das vacinación covid coas alteracións no ciclo menstrual. Segundo indican dende o Sergas, hai varios estudos que asocian cambios na cantidade do sangrado e na duración do ciclo coas inxeccións de Pfizer e Moderna. Segundo os datos recollidos no documento, en Galicia recibíronse 236 notificacións e o 10,59% delas foron de carácter grave. No que respecta ao tipo de acontecemenos rexistrados, os que máis frecuencia presentan son o sangrado menstrual intenso (56), o trastorno menstrual (51), a menstruación irregular (41) e a dismenorrea (39). En relación ao perfil de afectadas, o 62,7% son mulleres entre os 30 e os 49 anos.
Finalmente, o Sergas recorda a importancia de facer un seguimento e unha avaliación dos medicamentos aprobados polas autoridades competentes, posto que algunhas reaccións adversas son difíciles de detectar nos ensaios clínicos e preclínicos. Malia que as cifras que ofrecen dan conta da seguridade das vacinas, con porcentaxes moi baixas en relación ao número de doses administradas.
Se tiveches algunha reacción adversa a un medicamento podes notificalo na seguinte ligazón.
