Un proxecto busca desenvolver novos produtos derivados da resina natural galega para que sexan utilizados no sector dos pesticidas ou mesmo da cosmética. O Parque Tecnolóxico de Galicia (Tecnópole) acolleu este martes a presentación dunha iniciativa destinada a potenciar a industria resineira galega e mellorar a competitividade do sector.
A finalidade do proxecto, que desenvolve o Grupo Operativo RESFO (Resina, Fortalezas e Oportunidades de Mercado), é aumentar a rendibilidade dos montes galegos a través da mellora do aproveitamento resineiro, optimizando o proceso de destilación da resina natural de Galicia en envase pechado, situándoa como un produto de alta calidade.
Por outro lado, determinarán a calidade da resina natural galega, para o que levarán a cabo unha caracterización exhaustiva da mesma, identificando os atributos que lle confiren un valor diferencial no mercado global. Ademais, o proxecto inclúe o deseño de estratexias de promoción específicas para dar a coñecer as vantaxes da resina que se obtén en Galicia, fomentando a súa demanda tanto no eido nacional como no internacional.
Novos produtos derivados da resina, 100% naturais
O proxecto contempla así mesmo o desenvolvemento de novos produtos derivados da resina, que permitan substituír os derivados do petróleo en diversos sectores industriais. Así, preténdese valorizar a trementina da resina no sector dos pesticidas ou como ingrediente base de aromatizantes en cosmética, substituíndo compostos principais de orixe sintética e ofrecendo un produto 100% bio.
O plan, que acaba de poñerse en marcha, terá unha duración de dous anos. Busca impulsar a industria resineira galega, destacando as súas vantaxes competitivas e contribuíndo ao desenvolvemento sostible dos nosos montes.
Cooperación de empresas e institucións galegas
Estará coordinado pola empresa coruñesa Foresin, dedicada á consultoría e enxeñaría medioambiental, especializada en xestión forestal e no aproveitamento resineiro. Participan ademais o Grupo para a Análise Empresarial da Universidade de Vigo; a empresa Xagoaza Pinaster (O Barco de Valdeorras), industria que transforma resinas naturais procedentes de bosques xestionados de maneira sostible; Glecex, firma biotecnolóxica especializada en extractos naturais para sectores como a alimentación, nutracéutica e cosmética, con sede en Tecnópole; e a Fundación Cetemas, centro tecnolóxico e forestal da madeira de Asturias. Cóntase ademais coa colaboración de Enyiris Design Thinking Lab, dedicada ao deseño e a programación, situada en Tecnópole.
O Grupo Operativo RESFO recibiu o apoio na última convocatoria de Axudas para a Execución de Proxectos Innovadores dos Grupos Operativos da Asociación Europea de Innovación, cofinanciadas polo Fondo Europeo Agrícola de Desenvolvemento Rural (FEADER) dentro do Plan Estratéxico da Política Agraria Común.
