O enxeñeiro de Camiños, Canais e Portos Andrés Figuero Pérez, investigador do Grupo de Enxeñaría da Auga e do Medio Ambiente (GEAMA) da Universidade da Coruña, obtivo o segundo premio Modesto Vigueras 2021 da Asociación Técnica de Puertos y Costas, a entidade asociativa máis importante a nivel de portos de España, polo seu traballo Desenvolvemento de ferramentas predictivas para a toma de decisións en operatividade portuaria. Aplicación ao Porto da Coruña.
A investigación aborda a metodoloxía e o desenvolvemento de modelos predictivos, tanto do comportamento do buque atracado como do fenómeno de rebase, adaptados ás características do Porto Exterior da Coruña, para a súa implementación como ferramentas de axuda á toma de decisións na xestión portuaria.
A Asociación Técnica de Puertos y Costas é a sección española da Asociación Internacional Permanente de Congresos de Navegación. É unha sociedade de carácter técnico e científico, coa misión de potenciar o progreso tecnolóxico nos ámbitos de portos e costas e fomentar a creación dunha cultura común entre todos os profesionais que actúan neses campos.
O Premio Modesto Vigueras, convocado e outorgado pola ATPYC, ten carácter anual. O seu obxectivo principal é fomentar o interese e a especialización das novas xeracións de profesionais no ámbito portuario e costeiro, o desenvolvemento de novas ideas neses campos, así como incentivar a participación destes nas actividades nacionais e internacionais da Asociación.
