Son moitos e moitas, e están inmersos en proxectos ben interesantes. Aproveitando a volta a casa polo Nadal, o Instituto de Investigación Biomédica de A Coruña (INIBIC) e o Muncyt da cidade organizan este xoves 27, por noveno ano, a reunión galega de Mozos Investigadores no Estranxeiro.
O propósito do encontro, no que participan numerosos investigadores de referencia nos seus campos, é “abrir unha vía de intercambio e contacto” cos científicos e científicas galegas que actualmente están traballando en centros de investigación no estranxeiro, para “coñecer o seu traballo e facer posibles futuras colaboracións”.
O ano pasado, deste encontro saíu un Manifesto Galego pola Ciencia, que se pode ler nesta ligazón (PDF).
Desde as 10 da mañá deste xoves 27, no Muncyt celebraranse varias sesións de conferencias nas que investigadores e investigadoras no estranxeiro presentarán as súas liñas de traballo en diversas áreas de coñecemento. Para comezar, celebrarase un acto de benvida coa presenza do reitor da Universidade da Coruña, Julio Abalde; María Mayán, coordinadora do comité organizador do encontro e responsable do grupo CellCOM do Inibic; e Ana María Correas, coordinadora de Relacións Institucionais da sede coruñesa do Muncyt.
Despois do almorzo, a partir das 14.40, haberá un debate sobre a situación actual da ciencia en Galicia e as oportunidades para os investigadores. Participarán Isabel Orbe (directora xeral da fundación científica da AECC); Xosé Bustelo, profesor do CSIC e científico do Instituto de Biología Molecular y Celular del Cáncer (iBMCC) de Salamanca; María Pardo, xefa do Grupo Obesidomica do IDIS de Santiago; Manuel de León, profesor do CSIC no Instituto de Ciencias Matemáticas (ICMAT) de Madrid; David Posada, Catedrático de Xenética da UVigo; e Sonia Villapol, investigadora de neuroloxía e profesora no Institute for Academic Medicine do Houston Methodist Research Institute. A mesa estará moderada por Rafael Fernández Leiro, do Centro Nacional de Investigaciones Oncológicas (CNIO) ce Madrid.
A xornada pecharase coa entrega de varios premios: un á mellor traxectoria profesional, outorgado por Hijos de Rivera; outro á mellor traxectoria profesional na categoría de investigadora xoven outorgado pola Asociación de Mulleres Investigadoras e Tecnólogas en Galicia AMIT-Gal; e outro ao mellor traballo presentado durante a xornada.
A continuación terá lugar a clausura da xornada, coa presenza do alcalde da Coruña, Xulio Ferreiro, o xerente da área de Xestión Integrada da Coruña, Luis Verde, ademais de María Mayán e Ana María Correas.
