O Instituto de Investigación Sanitaria de Santiago (IDIS), o Instituto de Investigación Biomédica da Coruña (INIBIC) e o Instituto de Investigación Sanitaria Galicia Sur (IISGS) recolleron esta mañá as medallas Emilia Pardo Bazán que concede a Xunta de Galicia a aquelas persoas ou entidades que traballan a prol da igualdade. Dos centros sanitarios galegos subliñouse o seu exemplo de incorporación da muller ao mundo da ciencia, xa que os tres están dirixidos por mulleres. Isto sitúa a Galicia na cabeza, dado que dos 32 institutos desta índole que hai en España, tan só 10 teñen liderado feminino. As medallas Pardo Bazán tamén condecoraron a Asociación de Mulleres con Discapacidade de Galicia (Acadar) e a Rosa Celia Otero Graña, presidenta da Asociación Provincial de Amas de Casa, Consumidores e Usuarios da Coruña.
O evento para a entrega das medallas celebrouse este mércores no Museo de Belas Artes da Coruña. Ao acto asistiron a conselleira de Política Social e Igualdade, Fabiola García; a directora xeral de Promoción da Igualdade, María Quintiana; e a alcaldesa da Coruña, Inés Rey; entre outras personalidades. Durante o acto subliñouse a importancia de todas as persoas e entidades premiadas, dado que contribuíron e contribúen a lograr a igualdade efectiva en Galicia. Estes galardóns creáronse en 2019 e levan o nome da escritora Emilia Pardo Bazán, unha muller precursora na defensa dos dereitos da muller e do feminismo, así como do acceso á educación das mulleres.
Tres centros científicos
O IDIS, o INIBIC e o IISGS son considerados pola Xunta como un “referente nacional”. Ademais de estar liderados por mulleres, son “un exemplo da incorporación da perspectiva de xénero na investigación sanitaria“. O acto, no que participaron as directoras dos tres centros, puxo de manifesto o seu compromiso coa igualdade no ámbito da ciencia. “No IDIS entendemos que a igualdade non é só un principio ético, senón unha necesidade para o progreso de toda a sociedade; e co fin de conseguilo traballamos para construír un entorno onde se valore e respecte a diversidade”, sinalou a directora do IDIS, María Luz Couce, durante o discurso de entrega.
A asociación Acadar
Por outra banda, o recoñecemento a Acadar responde ao seu traballo “por todas as mulleres con discapacidade, pola defensa dos seus dereitos e pola mellora, en xeral, das súas vidas e benestar”. Esta entidade sen ánimo de lucro constituíuse no ano 2009 por un grupo de mulleres que tiñan como obxectivos comúns conseguir a igualdade efectiva de oportunidades das mulleres galegas con discapacidade.
Rosa Celia Otero Graña
Por último, Rosa Celia Otero Graña, presidenta da Asociación Provincial de Amas de Casa, Consumidores e Usuarios da Coruña recolleu a súa medalla. Nada en Santiago de Compostela en outubro de 1940, recoñécese o seu compromiso coa conquista de dereitos das mulleres, sobre todo as amas de casa. Ademais, participou activamente no Consello Galego das Mulleres.
