O Centro de Investigación en Medicina Molecular e Enfermidades Crónicas (CiMUS) da Universidade de Santiago (USC) abre o proceso selectivo para o programa formativo de persoal investigador predoutoral. Esta iniciativa está enmarcada dentro do recoñecemento do centro como Unidade de Excelencia María de Maeztu, unha acreditación recibida o ano pasado polo Ministerio de Ciencia e que pon en valor o impacto científico, a capacidade de atracción de talento internacional e a transferencia clínica do CiMUS.
Nesta convocatoria, o centro da USC ofrece seis contratos internacionais, financiados pola Axencia Estatal de Investigación, cunha duración de catro anos, destinados ao desenvolvemento integral da carreira investigadora nas súas primeiras etapas, incluíndo estancias internacionais e actividades formativas. O prazo para presentar solicitudes finaliza o 19 de abril.
Formación de excelencia
O Programa de Doutoramento Internacional do CiMUS ofrece unha formación estruturada e aliñada cos Principios para a Formación Doutoral Innovadora da Comisión Europea. As persoas seleccionadas integraranse en grupos de investigación punteiros, con acceso a infraestruturas avanzadas e un ecosistema que favorece a interacción entre investigación básica e traslacional. O programa promove a colaboración interdisciplinar e a participación en iniciativas internacionais, fortalecendo tanto o desenvolvemento científico como a proxección profesional.
O programa ofrece un contrato de catro anos co seguinte salario bruto anual: 19.007,24 euros o primeiro e segundo ano; 20.364,96 euros o terceiro e 25.456,06 euros o cuarto.
Ademais, a iniciativa proporciona 7.000 euros para financiar estancias de investigación noutras institucións de I+D, así como a cobertura das taxas de matrícula do programa de doutoramento durante todo o período de catro anos. Este programa inclúe, ademais, talleres e actividades de mentoría que fomentan o desenvolvemento persoal e profesional. O centro organiza periodicamente seminarios e reunións, impartidos por expertos internacionais no ámbito biomédico, que permiten aos participantes ampliar os seus coñecementos e a súa rede de contactos profesionais.
As persoas seleccionadas deben realizar unha estancia de investigación internacional de polo menos tres meses e participar en actividades de divulgación científica, como congresos e eventos especializados. Tamén deben presentar o seu traballo durante o Workshop anual do CiMUS.
Áreas e proxectos de investigación
Os proxectos de investigación de doutoramento aos que poden optar as persoas candidatas son os seguintes:
- Deseño e caracterización de nanopartículas cargadas de ARNip/ARNm para o tratamento da fibrose hepática. Dirixido por Rubén Nogueiras Pozo e María José Alonso Fernández.
- Modificacións de ARN en elementos transpoñibles durante as transicións temperás do destino celular e o cancro. A cargo dos investigadores principais Diana Guallar Artal e Miguel Fidalgo Pérez.
- Papel do SUMO extracelular na infección viral, a activación inmune e a progresión do cancro. Liderado por Carmen Rivas Vázquez e Iria Gómez Touriño.
- Regulación circadiana da resposta á radioterapia en gliomas adultos e pediátricos. Baixo a dirección de Olga Barca Mayo e Yolanda Prezado Alonso.
- Reprogramación parcial xenética e química da obesidade e a síndrome metabólica. Coa dirección de Manuel Collado Rodríguez e Sulay Tovar Carro.
- Papel do estróxeno na configuración dos circuítos neuromoduladores cerebrais. Dirixido por Alba Vieites Prado e Ismael González García.
- Vesículas extracelulares como mediadores da comunicación astrocito-neurona na enfermidade de Parkinson. Coa dirección de Ana Isabel Rodríguez Pérez e José Manuel Castro Tubío.
- Control periférico da homeostase dos órganos metabólicos. A cargo de Marta Varela Rey e Ashwin Woodhoo.
- Reprogramación inflamatoria da barreira hematoencefálica como factor temperán de caquexia asociada ao cancro. Coa dirección de Rosa Señarís Rodríguez e Dolores Viña Castelao.
Podes obter máis información na seguinte ligazón.
