A madrugada do 26 de xaneiro o buque HC Eva Marie atracou no porto de Vigo. O temporal provocado pola borrasca Eowyn, con ondas superiores aos 10 metros, obrigouno a desviarse, dado que un “corremento de carga” provocou danos en nove dos seus 96 contedores. A mercadoría que transporta o buque son obuses que saíron de Xordania con destino a Alemaña, a onde deberían ter chegado o 28 de xaneiro. Segundo informou este luns a Autoridade Portuaria de Vigo, a empresa cargadora está a traballar nun plan de seguridade, malia que o HC Eva Marie leva parado no peirao Transversal case unha semana. A explosión da súa mercadoría, a ollos doutros accidentes similares, podería ser catastrófica, mais o porto de Vigo asegura “que non supón ningún risco”.
Segundo un comunicado emitido durante a fin de semana pola Autoridade Portuaria de Vigo, a carga do buque está catalogada como de Clase I, División 1.1 e de Tipo E. Isto significa, tal e como recolle o Real Decreto 145/1989, que existe o risco de que a carga explote en masa. O Regulamento Modelo de Recomendacións Relativas ao Transporte de Mercadorías Perigosas das Nacións Unidas especifica que na Clase I de explosivos están incluídos a dinamita, a pólvora e o TNT. Estas substancias considéranse “extremadamente perigosas”, mais todo depende da cantidade e das condicións nas que estea almacenada. No que respecta ao Tipo E, esta clasificación fai referencia a explosivos “con gran poder de detonación”.
“Sen risco”
Con todo, a última información ofrecida polo porto indica que o sábado 1 de febreiro —catro días despois de que arribase o HC Eva Marie— se realizou a primeira inspección por parte dun enxeñeiro procedente da empresa cargadora, xunto ao capitán e ao persoal de seguridade do buque. Ían acompañados por responsables da consignataria e o xefe de División de Seguridade da Autoridade Portuaria. Nesta revisión constatouse, sempre segundo os datos do porto, que os danos sufridos polo temporal “só afectan a estrutura externa dos contedores”, “pero en ningún momento á mercadoría que transportan”.
A empresa cargadora, a través dunha nota de prensa da Autoridade Portuaria, sinala que os obuses están desmontados, “tal e como establecen as normas internacionais para o movemento desta mercadoría”. Insisten, ademais, en que a carga está correctamente estibada e dentro das caixas de protección, e poñen énfase en que “non supón ningún risco”.
A destrución de 2020
De momento non trascenderon datos oficiais das toneladas que transporta o buque nin da composición dos explosivos. Con todo, a súa capacidade destrutiva queda patente na normativa. O desastre de Beirut de 2020 causouno a explosión de 2.750 toneladas de nitrato de amonio. Segundo os datos de Amnistía Internacional, morreron 217 persoas, resultaron feridas 7.000 e os efectos da onda expansiva afectaron a edificios situados a un radio de 20 quilómetros. Segundo o Real Decreto 145/1989, esta substancia está catalogada de Clase 5, polo que sería menos perigosa que a que transporta o HC Eva Marie.
Vixilancia de 24 horas
O buque refuxiado en Vigo navega baixo a bandeira de Antigua y Barbuda e permanece dende hai unha semana na área do porto destinada aos navíos de mercadorías perigosas. Segundo informaron diferentes medios a través dun comunicado emitido pola Autoridade Portuaria de Vigo, o barco está a ser vixiado pola Policía Portuaria e a Garda Civil, así como un equipo de seguridade privado as 24 horas. Pese aos datos anteriormente expostos, o porto da cidade olívica asegura o seguinte: “Leváronse a cabo as preceptivas análises de risco e as condicións de atraque fixáronse respectando a normativa en vigor, garantindo, en todo momento, a seguridade das persoas, a infraestrutura e o propio buque”.
Para que o barco retome a súa navegación é preciso asegurar os nove contedores danados. Para iso estase a traballar nun plan para a súa recolocación. Segundo a última información da Autoridade Portuaria, o plan consistirá en mover os contedores en bo estado a unha bodega baleira co obxectivo de illar os que están danados. Despois disto, persoal especializado neste tipo de carga viaxará a Vigo nas próximas horas para inspeccionar os contedores e mover a carga dos que están danados a outros preparados para a mesma fin. “En ningún momento se desembarcará a mercadoría no peirao”, indica o porto.
Accidente de Halifax
Con todo, os resultados dun accidente cos 96 contedores do buque sería catastrófico para a cidade e o porto de Vigo. Á vista doutros sucesos como o de Beirut ou o de Halifax, acontecido en 1917 en Canadá. Houbo unha colisión entre dous buques, un de carga francés e outro de vapor noruegués. Morreron arredor de 2.000 persoas, 9.000 quedaron feridas e a cidade quedou moi danada. O navío galo levaba 2.300 toneladas de ácido pícrico húmido e seco, 200 de trinitrotolueno (TNT) —de Clase I, como a carga do HC Eva Marie—, 10 de algodón de pólvora e 35 de benceno.
