É rendible investir en ciencia? Aínda que pareza unha obviedade, é un deses principios que as veces cómpre explicar. Con ese propósito comezou este martes o debate Investir en Ciencia si é rendible: Impacto e retorno, que organizan Unirisco e Bio&Tech Smart Capital de Noso Capital. A dobre xornada, que conclúe este xoves, trata de impulsar o investimento en transferencia do coñecemento e poñer en valor a súa relevancia para o desenvolvemento social e económico. Tras un encontro pechado este martes para investidores, as xornadas continúan xa abertas ao público na Facultade de Medicina e Odontoloxía da Universidade de Santiago de Compostela (USC).
Inmaculada Rodríguez, directora xeral de Unirisco, sinala a sensación xeral de satisfacción entre as persoas que están asistindo ao evento: “A primeira edición, que tamén se celebrou en Santiago, foi un pouco experimental, xa que naceu da inquedanza que tiñamos algúns investidores de España en xuntarnos e poder divulgar sobre a importancia de investir en ciencia. A idea era trasladar esta segunda edición a outras cidades, como Madrid, Barcelona, Málaga ou Zaragoza, mais todo o mundo pediu vir a Galicia. É un lugar cun ecosistema moi consolidado, algo que para os investidores de fóra da comunidade ten unha gran importancia”.
Así, a axenda da xornada incluíu a visita a lugares emblemáticos da cidade, como a Catedral e o Pórtico da Gloria, así como aos centros que integran este ecosistema, como o Instituto de Investigación Sanitaria (IDIS), a Fundación Pública Galega de Medicina Xenómica ou o Centro Singular de Investigación en Medicina Molecular e Enfermidades Crónicas (CiMUS). Pola tarde, no salón de actos, os investidores asistiron a distintos relatorios arredor do contexto económico do ecosistema do investimento en España, os fondos de inversión da Xunta (Xesgalicia) ou os aspectos a mellorar na transferencia de tecnoloxía. Ademais, tamén tiveron lugar diferentes presentacións de proxectos.
“Este ano acompáñannos investidores de fóra de Galicia, por exemplo, a lanzadeira Marina de Empresas, que é a aceleradora de Mercadona e Juan Roig e que está visitando o ecosistema galego co obxectivo de coñecelo e poder interactuar máis con el. Todas as persoas ás que convidamos responderon positivamente porque sexamos de onde sexamos temos en común a inquedanza por resolver a opacidade e o descoñecemento da sociedade do sector industrial. Queremos darlle visibilidade ao esforzo que se leva facendo ao longo de tantos anos porque, como comentaba un dos relatores, España é o terceiro país en produción científica en publicacións, pero está no posto 30 en canto a transferencia e creación de empresas”, manifesta a directora xeral de Unirisco.
O reto do investimento
A problemática arredor da transferencia é a cuestión central da xornada de portas abertas de este xoves, na que intervirán representantes de nove universidades españolas e europeas e portavoces dos ecosistemas de ciencia e investimento de Madrid, a Comunidade Valenciana, Murcia, o País Vasco, Andalucía, Aragón e Cataluña, alén do caso galego.
“Cando temos unha doenza, todos queremos un tratamento, mais en realidade descoñecemos bastante sobre o investimento e a investigación tan necesaria que hai detrás. Por poñer o exemplo que daba Ángel Carracedo sobre a xenética, que pode definir unha diana terapéutica de maneira que o efecto dun fármaco concreto se multiplique, tamén no caso de enfermidades comúns”, explica Inmaculada Rodríguez.
“Temos que pensar a quen lle transferimos o coñecemento, que necesidades ten o mercado”
Inmaculada Rodríguez, directora xeral de Unirisco
Precisamente Carracedo, director da Fundación Pública Galega de Medicina Xenómica, intervirá xunto con representantes de Ribera Salud, a Fundación Universidad Autónoma de Madrid e Fujitsu nunha mesa redonda arredor do investimento que dá vida.
“Ata o de agora sempre se primou a publicación contra a transferencia, sabendo que moitas veces son inimigas. Se un investigador anticipa e adianta achados ou investigacións que está levando a cabo está matando unha posible patente. Por outra banda, transferir significa buscar á outra parte: a quen se lle transfire o coñecemento? Que necesidades ten o mercado? Se as empresas e as universidades están de costas non existe comunicación, que era o que estaba ocorrendo. Os centros singulares axudan a que as empresas atopen o que precisan: persoas que lles faga descubrimentos de moléculas ou de solucións tecnolóxicas”, sinala Rodríguez.
Neste sentido, a directora xeral de Unirisco pon de exemplo as industrias convencionais como un aspecto obsoleto fronte a un investimento que busca desenvolverse como actividade económica, industrial e de creación de emprego e riqueza: “Hai uns anos montabamos empresas de parafusos. Agora facémolo de ciencia e tecnoloxía aproveitando o talento que hai no país”.
Novos modelos
Nun panorama en constante cambio e evolución, esta xornada tamén quere traer exemplos de éxito que poidan servir de inspiración e aprendizaxe para outras persoas. Así, outra das mesas redondas do día de portas abertas xirará arredor das novas formas de investimento.
“A forma convencional implicaba que o científico ou o tecnólogo tiña que construír a empresa e buscar un equipo de expertos en ciencia e en xestión. Nestes momentos atopámonos con que unha das carencias para transferir ou crear empresas é que o investigador non ten ganas de ser empresario. Así, aparecen figuras como os venture builders, construtores de empresas que se asocian cun investigador mentres que eles fan toda a parte económica, financeira, comercial e xurídica, repartindo porcentaxes da empresa. Logo tamén existen outras vías, como as aceleradoras ou o programa Ignicia, da Axencia Galega de Innovación. A idea é ter un acompañamento durante o camiño, porque montar unha empresa e que vaia ben non é doado”, di Rodríguez.
A importancia do factor tempo
Neste sentido, a directora xeral de Unirisco tamén sinala o factor do tempo, posto que é un recurso que debe ser aproveitado con eficiencia: “Cando dedicas o teu tempo á xestión, sendo outro o teu perfil, estás quitándolle tempo ao desenvolvemento da túa área. Ademais, hoxe en día os tempos son moi importantes e non podes permitirte estar 20 anos investigando para sacar algo adiante. Unha vez que arrancas é importante que vaias rápido”.
Por estes motivos, e para continuar inspirando con exemplos tanxibles, o evento concluirá cos premios á innovación, ao ecosistema e á Start-Up: “Sexamos científicos ou investidores, é importante ter un recoñecemento e saber que o que facemos está gustando. Queremos agradecer a distintas entidades o seu traballo e logros e esta tamén é outra forma de que a xente vexa que outros puideron facer ese camiño, que é posible”, explica Rodríguez.
