A segunda edición da xornada ‘Investir en Ciencia si é rendible: Impacto e retorno’ reunirá a máis de 50 relatores en Santiago de Compostela os vindeiros días 21 e 22 de febreiro para analizar o impacto das tecnoloxías disruptivas e a importancia de crear ecosistemas emprendedores. Participarán representantes de nove universidade españolas e europeas e portavoces dos ecosistemas de ciencia e tecnoloxía e investimento de Madrid, Comunidade Valenciana, Murcia, País Vasco, Andalucía, Aragón, Cataluña e Galicia, e analizarán casos de éxito e novos proxectos de investimento en novas tecnoloxías e ciencias da vida que contribúen a un desenvolvemento sostible.
Organizado por Unirisco e Bio&Tech Smart Capital de Noso Capital, o evento pretende impulsar o investimento en transferencia do coñecemento e proxectos disruptivos e poñer en valor a súa relevancia para o desenvolvemento social e económico. “É un encontro de todo o ecosistema español de investimento e transferencia de coñecemento para compartir experiencias e coñecer casos de éxito, investimentos que crean ecosistemas e aquelas que contribúen a facer país”, sinalou Inmaculada Rodríguez, directora de Unirisco.
Pola súa banda, o CEO de Noso Capital, Tomás Perez, apuntou que “é unha oportunidade para coñecer o impacto das tecnoloxías disruptivas e a intelixencia artificial; os investimentos que responden a retos e que son capaces de crear un novo ecosistema de innovación e un espazo onde interactuar con fondos de investimento, xestoras, inversores anxelicais, oficinas familiares e entidades financeiras”.
Esta segunda edición espera superar a participación do primeiro encontro, celebrado en 2023, ao que se sumaron os 30 principais investidores de emprendemento en innovación e transferencia tecnolóxica que operan en España e máis de 200 asistentes.
Que se pode mellorar en transferencia de tecnoloxía?
A primeira xornada, destinada a investidores especializados, contará coa intervención de Toni Villuendas, analista de investimentos de Angels (a oficina familiar de Juan Roig, presidente executivo de Mercadona, que lidera a estratexia investidora de Mariña de Empresas – Lanzadera, o maior ecosistema de startups de Europa situado en Valencia), examinará a situación actual do contexto económico do ecosistema investidor español e as súas oportunidades. Pola súa banda, Xesgalicia expoñerá os fondos de investimento en Galicia e a estratexia do Goberno galego neste ámbito.
A continuación, debaterase “que se pode mellorar na transferencia de tecnoloxía”, nunha mesa con relatoras das universidades de Madrid, Barcelona, Murcia e Santiago de Compostela, xunto a científicos españois que desenvolven a súa actividade en EE.UU. e o CDTI. A primeira sesión concluirá cun coloquio liderado por José Zudaire, director xeral de SpainCap, no que interpelará aos asistentes para expor reflexións sobre a transferencia do coñecemento á sociedade. Ademais, realizarase a presentación do ecosistema revelación en España, Zebra Ventures (Aragón), e de empresas disruptivas en rolda de financiamento como Oncostellae, Inverbis, Subgen AI e Zerintia Health Tech.
Investimento en tecnoloxías disruptivas e ecosistemas
Na segunda xornada, científicos do CITIC (Centro de Investigación en Tecnoloxías da Información e as Comunicación), o CESGA (Centro de Supercomputación de Galicia) e o CiTIUS (Centro de Singular de investigación en Tecnoloxías Intelixentes), xunto á empresa Fujitsu tratarán de responder á pregunta “superamos os límites do coñecemento?”.
Ademais, unha mesa de debate reflexionará sobre o investimento que crea ecosistema mediante exemplos como Helsinqui Incubator, iniciativa de colaboración entre a Universidade e o concello de Helsinqui cuxo obxectivo é crear 100 empresas novas e innovadoras por ano, e Startup Olé, un dos maiores eventos do ecosistema Tech-Startup en Europa. Na charla tamén participan representantes do Clúster TIC Galicia, KM Zero Open Innovation Hub, Business Factory Food, Ship2B Ventures e Startup Galicia.
A continuación, representantes de entidades que impulsan a transferencia tecnolóxica como The Collider, TRL+, Nowture, BIGBAN, Zubi Labs e BHV Partners expoñerán novas formas de investir. Pola súa banda, as xestoras e fondos de capital privado Clave Capital, Asabys Partners, Capital Cell, BeAble Capital, Inveready, Ysios Capital, Swanlaab AgriFood-tech Fund, Bullnet Capital e Bio&Tech Smart Capital Noso Capital presentarán casos de investimento que crean valor.
As empresas Estrela Galicia, Abanca e Elewit (Redeia) darán conta de casos investimento que responden a retos concretos das empresas. E a consultora Ernest & Young presentará o actual ecosistema fiscal de emprendemento e innovación de España. Por último, coñeceranse iniciativas institucionais de investimento mediante programas do CDTI, do Instituto Galego de Promoción Económica (IGAPE), a Axencia Galega de Innovación (GAIN), o Instituto de Fomento da Rexión de Murcia e a Fundación Europea para a Innovación.
Un diálogo sobre o investimento que dá vida protagonizado pola Fundación Pública Galega de Medicina Xenómica que dirixe o científico Ángel Carracedo, Ribeira Saúde e Fujitsu pecha esta xornada.
Premios Investir en ciencia si é rendible
A segunda edición deste evento concluirá coa entrega dos I Premios ‘Investir en ciencia si é rendible’ que distinguirá o esforzo de organizacións e empresas nas categorías de innovación, ecosistema e startup.
Estes premios son unha homenaxe en memoria do legado profesional e persoal de Isaac Chocron, impulsor do ecosistema de emprendemento e innovación español, cuxo lema era: “Traballemos xuntos no impulso do ecosistema de innovación”.
