GCiencia recibiu este xoves o Premio Lois Peña Novo pola súa contribución a consolidar o uso do idioma galego, nun acto desenvolvido no castelo de Soutomaior. Os Peña Novo recoñecen dende 1995 o labor de persoas, entidades ou empresas que traballan a prol da lingua galega desde distintos ámbitos profesionais. Xunto a GCiencia, recibiron o seu galardón a guionista, redactora e directora de programas de debate e informativos Rosa Castro Legazpi e o historiador, escritor e divulgador Felipe Senén López, pola súa traxectoria na defensa do patrimonio cultural de Galicia.
O xurado valorou a “contribución decisiva” de GCiencia para “poñer en valor a lingua, dándolle visibilidade a través das redes sociais e achegándoa á cidadanía”. “Promove unha valorización do galego en ámbitos científicos nos que a nosa lingua é minoritaria”, apunta o fallo do xurado, que engade: “GCiencia provoca un efecto positivo na utilización do galego na sociedade, dotándoo de prestixio e escorrentando prexuízos lingüísticos”.
Louva de Marisa Castro
A bióloga e escritora Marisa Castro, presidenta do xurado, foi a encargada de louvar o labor de GCiencia antes da entrega do premio, nun discurso no que incidiu nos fitos logrados polo xornal de divulgación de referencia en Galicia, tanto polo seu seguimento e comunidade de seguidores como polo feito de logralo usando o galego. “GCiencia convértese, por dereito propio, nun dinamizador de amplo espectro” do idioma de Galicia, “para facer ver á cidadanía que o galego é unha lingua válida para calquera disciplina e escorrentando prexuízos lingüísticos que tollen o seu uso acotío”, agradeceu.
“Aproveito a oportunidade para expresarlle, en nome propio e de todos os membros da Fundación Peña Novo, a miña máis cordial noraboa polo premio recibido, froito dun traballo arreo a prol da cultura e da lingua do país”, sinalou Marisa Castro. Xunto ela, formaron parte do xurado a maxistrada titular do Xulgado de Violencia sobre a Muller de Vigo, Paz Filgueira Paz; o escritor Xulio Ríos Paredes, e o escritor e lingüista Antón Dobao. Actuou como secretaria Carme Pérez Vaquero, tamén secretaria da Fundación Lois Peña Novo. O acto deste xoves contou coa presenza de centos de persoas e estivo presidido polo secretario xeral de Política Lingüística da Xunta, Valentín García, e polo alcalde de Soutomaior, Manuel Lourenzo.
O paradoxo do galego
En nome de GCiencia recibiu o premio o seu director e fundador, Pablo López, que agraceu a distinción en nome do xornal e dos seus traballadores e colaboradores. López recordou os dez anos que se fan este 2023 dende a creación de GCiencia, un tempo no que se logrou consolidalo entre os máis lidos dos dixitais galegos. Recordou o director que a súa creación baseouse na convicción de facer xornalismo e divulgación e de facelo en galego. “O uso do noso idioma tivo un efecto paradoxal, porque pese a penalización coa que os grandes buscadores castigan os medios en linguas como a nosa, foi unha decisión que dotou de toda a súa personalidade a GCiencia, un medio que agora non se concibiría en calquera outro idioma”, afirmou, para engadir: “En contra do que sinala o xurado, podería dicirse que nós non dignificamos o galego, senón que foi o galego quen nos dignificou a nós”.
O Peña Novo súmase a unha longa lista de premios recollidos por GCiencia, que foi distinguido en 2019 co Prisma ao Mellor Novo Medio, o galardón da divulgación científica de maior prestixio en España, e en 2020 co Premio da Crítica de Galicia. O de Xornalismo Dixital do Foro da Comunicación de Galicia (2015), o Mil Primaveras da Coordinadora de Traballadores de Normalización da Lingua (2019) e o Rosalía de Castro de Cultura Galega que outorga a Deputación da Coruña (2019) son outras das distincións acadadas polo xornal nestes dez anos de existencia.
